Ուսուցիչներն ու տնօրեններն այլևս պարտավորություն չունեն որևէ կերպ ներգրավվելու ընտրական գործընթացներում. Արայիկ Հարությունյան (տեսանյութ)
Ցուցակը կազմվել է պրոֆեսիոնալիզմի, քաղաքական անցած ճանապարհի, քաղաքական պրոցեսների վրա ազդելու հնարավորությունները հաշվի առնելով՝ հանձնաժողովներում տեղ զբաղեցնելու հնարավորություններից ելնելով: Այս մասին ԱԺ-ում հետ զրույցում ասաց ՔՊ վարչության անդամ, ՀՀ ԿԳ նախարարի պաշտոնակատար Արայիկ Հարությունյանը:
Անդրադառնալով հարցին, թե, օրինակ, լրագրողներ Սիսակ Գաբրիելյանը, Թագուհի Թովմասյանն անցե՞լ են այդ քաղաքական ճանապարհը, նա արձագանքեց, որ մշտապես պրոցեսների մեջ եղած մարդիկ են այդ ճանապարհն անցնում:
Դիտարկմանը, թե մամուլում տեղեկատվություն է հայտնվել, որ Նիկոլ Փաշինյանը պատռել է ՔՊ նախնական ցուցակը, Արայիկ Հարությունյանը պատասխանեց. «2008թ., երբ որ ավելի խորը քաղաքական պրոցեսների մեջ մտա, ինձ մոտ միշտ ծիծաղ էր առաջացնում նման հրապարակումը, երբ որ, ասենք, գործընկերներիդ հետ նստած մի շտաբում աշխատում ես , մեկ էլ մամուլը գրում է, որ նրանցից երկուսը միմյանց քիթ են կոտրել, կռվել են իրար հետ արել, բայց այդ մարդիկ քեզ հետ նստած են: Ցուցակի քննարկումները բավականին հարթ են անցել, եղել են, իհարկե, տարակարծություններ, բայց այդպիսի բան չի եղել»,-շեշտեց Արայիկ Հարությունյանը:
Լրագրողները հետաքրքրվեցին՝ արդյոք ճի՞շտ է այն տեղեկատվությունը, թե կոնկրետ իրեն և Արարատ Միրզոյանին թիվ 3՝ Շենգավիթ, Մալաթիա-Սեբաստիա վարչական շրջաններն ընդգրկող տարածքում ռեյտինգային ձայներ ապահովելու հարցում օգնելու է պատգամավոր, գործարար Սամվել Ալեքսանյանը, Արայիկ Հարությունյանն ասաց.
«Դուք ինչպե՞ս եք պատկերացնում, այսքան ժամանակ նման երևույթ կամ դրսևորում, համագործակցություն նման անձանց հետ տեսե՞լ եք մեր գործողություններում: Խոսում են, թող խոսեն»,-ասաց նա:
Անդրադառնալով հարցին, թե ինչ տակտիկա են որդեգրելու քարոզարշավին՝ քայլելու են կամ այլ գործողություն են անելու, Արայիկ Հարությունյանն ասաց.
«Խնդրում եմ սպասել, երբ սկսենք քայլել, չքայլել, թռչել, թռչկոտել, այն ժամանակ կմեկնաբանենք»,-նկատեց նա:
Որպես ԿԳ նախարարի պաշտոնակատար՝ Արայիկ Հարությունյանը վստահեցրեց, որ ուսուցիչներն ու տնօրեններն այլևս պարտավորություն չունեն որևէ կերպ ներգրավվելու ընտրություններին: