Сенатор: Ногиронлар ҳаётига доир кўплаб муаммолар йиғилиб қолган
![Сенатор: Ногиронлар ҳаётига доир кўплаб муаммолар йиғилиб қолган](https://gdb.rferl.org/9016244F-482F-446B-AC2C-201C91C78574_w800_h450.jpg)
Ўзбекистонда 600 минг нафардан ортиқ ногиронлар ҳаёт кечирмоқда, аммо уларнинг таълим олиши ва бандлиги борасида йиллар мобайнида кўплаб муаммолар йиғилиб қолган (“Жамият”, 19 октябрь). Масалан, Тошкент вилоятида 44 мингга яқин ногирон яшайди. “Вилоятда ногиронлиги бўлган шахсларнинг тақдирига айтарли эътибор қаратилмайди. Улар шаҳар ва туманларда ҳануз эски тизимда қайта-қайта кўрикдан ўтказиляпти. Боз устига Тиббий-меҳнат эксперт комиссиялари талаб қиладиган айрим текширувлар анча қиммат” дейди Олий Мажлис Сенати аъзоси Маъсуда Ворисова. Масалан, бирор онкологик касалга чалинган бемор камида 100-150 минг сўм сарфлаб ҳар йили тиббий кўрикдан ўтиши керак. “Ёки ампутантлар, яъни қўл ёхуд оёғи йўқ шахслар ҳам ҳар йили тиббий кўрикдан ўтиши талаб этилади. Ахир, уларнинг ногиронлиги шундоқ ҳам кўриниб турибди, оёқ-қўли ўсиб чиқмаслиги тайин-ку”, дейди сенатор М.Ворисова. Қайд этилишича, хориж тажрибаси асосида ногиронликни белгилаш тизимини кўриб чиқиш, хусусан, коррупциянинг олдини олиш мақсадида тиббий экспертиза шаффофлигини таъминлаш лозим.