Ռոստովում բնակվող հայ մասնագետը տեսողությունը կորցնելուց հետո իր բուժական մերսումներով օգնում է մարդկանց ոտքի կագնել
Ռուսաստանի Դաշնության Դոնի Ռոստով քաղաքում բնակվող նախկին գործարար Եղիազար Շահինյանը տեսողությունը կորցնելուց հետո յուրացրել է մերսման արվեստն ու այժմ օգնում է անհույս հիվանդներին ոտքի կանգնել: 39-ամյա բժիշկ-մերսողի պատմությանն անդրադարձել է «Կոմսոմոլսկայա պրավդան»:
«Այս զարմանահրաշ բժշկի բուժական մերսումները շատերին են կյանքի վերադարձնում. նա բուժում է երեխաներին, ծերերին և ուղեղի կաթված տարած մարդկանց: Նա որոշել է նվիրել իրեն թույլերին օգնելուն, ովքեր վատ են իրենց զգում և օգնության կարիք ունեն, ավելի շատ, քան ինքը: Պատկերացրեք միայն, նա ինքը չի տեսնում, սակայն նրա զգայուն ձեռքերը հրաշքներ են գործում», - հայտնեց թերթի հետ զրույցում Ռոստովի բնակչուհի Աննա Մոլոտովան:
39-ամյա Շահինյանին, որին քաղաքում սկսել են անվանել «բժիշկ Եգորուշկա», տեսողությունը կորցրել է ընկնելուց հետո ստացած լուրջ վնասվածքի հետևանքով:
Տեսողական խնդրի պատճառով նրան մերժել են աշխատանքի ընդունել Ռոստովի պետական բուժհաստատություններում, և նա մասնավոր գործունեություն է սկսել ծավալել քաղաքի գեղեցկության սրահներից մեկում, որտեղ էլ մինչ օրս ընդունում է իր հիվանդներին: