Որոշել էի, որ այստեղ պետք է նշանակվի զինվորական բարձր կոչում ունեցող մեկը․ Փաշինյանը կապանցիներին բացատրեց, թե ինչու է Հունան Պողոսյանին նշանակել Սյունիքի մարզպետ
Ի՞նչ ենք մենք ուզում: Սյունիքի մարզում կապանցիների հետ հանդիպմանը, դիմելով հրապարակում հավաքվածներին, հարց բարձրացրեց վարչապետի ժամանակավոր պաշտոնակատար Նիկոլ Փաշինյանը: Հետո ինքն էլ պատասխանելով հարցին՝ նշեց՝ ուզում են մի Հայաստան, որտեղ տեղ չունեն բռնությունը, ծայրահեղականութունը, կոռուպցիան, կեղծիքը, օլիգարխիան: Ներկայացրեց՝ այստեղ է սատարելու Կապանի համայնքապետի «Իմ քայլը» դաշինքի թեկնածուին:
«Երեկ ես հայտարարություն արեցի, թե ՀՀ-ում այլևս չկան օլիգարխներ, և իմ այս հայտարարություններից հետո եղան հայտարարություններ, որոնք ինչ-որ կասկածելի գործարքներ էին փնտրում իմ հայտարարությունների հետևում», - ասաց նա:
Առաջարկեց արձանագրել, որ այսքան տարի ՀՀ-ում օլիգարխան ամենաշատ օգտագործվող բառերից է: «Այն նշանակում է՝ քչերի իշխանություն, քչերի իշխանության ներկայացուչիչ: Եվ ասելով, որ չկա օլիգարխիա, ես ասում եմ, որ քչերի իշխանությունն այևս տապալված է, և ՀՀ-ում հաստատված է մեծամասնության, այսինքն՝ ժողովրդի՝ ձեր իշխանությունը, - ասաց նա՝ հավելելով, որ դա չի նշանակում, որ ովքեր նախկինում օրիգարխներ են եղել, դադարել են գոյություն ունենալուց. «Ո՛չ: Նրանց կարգավիճակն է դադարել գոյություն ունենալուց, որովհետև ՀՀ-ում չի կարող լինել մարդ, որ մտածի ինքն ուժեղ է ժողովրդից, որ մտածի իր իշխանությունն ավելի ուժեղ է ժողովրդի, պետական իշխանությունից»:
Այնուհետ նա անդրադարձավ Հունան Պողոսյանին Սյունիքի մարզպետի պաշտոնում նշանակելու հարցին: Արձագանքեց այն դիտարկումներին, որ Հունան Պողոսյանը Սյունիքի մարզից չէ՝ հիշատակելով, որ իր՝ Երևանի քաղաքապետի թեկնածու առաջադրվելու ժամանակ էլ կային խոսակցություններ, որ ինքը ծնունդով երևանցի չէ: «Տեղային հայրենասիրությունն ամենավտանգավոր երևույթն է», - ասաց նա:
Նիկոլ Փաշինյանն ընդգծեց՝ Սյունիքը Հայաստանի, ողջ հայության, անգամ Արցախի ողնաշարն է, և այն չի սահմանափակվում մի մարզով, քաղաքով կամ գյուղով: Մատնանշեց՝ Սյունիքի մարզը Իրանի Իսլամական Հանրապետության հետ սահման ունեցող միակ մարզն է և նկատեց, որ շատ հաճախ այստեղով արձանագրվում են թմրամիջոցների խոշոր խմբաքանակների ներհոսք դեպի ՀՀ:
«Դրանց մի մասը դուրս է գալիս ՀՀ-ից՝ վտանգելով մեր երկրի հեղինակությունը, մի մասը մնում երկրի ներսում՝ վնասելով մեր երիտասարդներին։ Եվ ինձ համար կարևորագույն խնդիր է ջարդել այդ նարկոտրաֆիկի ճանապարհը», - ասաց նա՝ հավելելով, որ միամտություն կլինի կարծել, որ դրանով միայն օտարերկրացիներն են զբաղվում, - «Նրանք չեն կարող դա անել, եթե չունենան գործընկերներ այստեղ»:
Նիկոլ Փաշինյանը նաև նշեց, որ չնայած հայտարարում է, որ երկրում չկա օրիգարխիա, սակայն համարում է, որ ամենառիսկային մարզը և գոտին այդ առումով Սյունիքի մարզն է: «Չենք կարող թույլ տալ, որ այստեղ այդպիսի երևույթները զարգանան», - ասաց նա:
Նշեց, որ հենց այդքանը հաշվի առնելով, Սյունիքի մարզում եղած խնդիրների մասին մտածելով՝ նա որոշել էր, որ այստեղ մարզպետ պետք է նշանակի զինվորական բարձր կոչում ունեցող մեկին: Այսպես է, նրա պատմածով, իր որոշումը կանգ առել Հունան Պողոսյանի վրա:
«Ոչ մի գաղտնիք չկա, թե ով է Հունան Պողոսյանը, և ով եմ ես: Կարող եմ ասել, թե վերջին անգամ որտեղ եմ նրան տեսել՝ փշալարերից այն կողմ», - ասաց նա՝ նկատելով, որ խոսք է գնում, որ Հունան Պողոսյանը բարձրաստիճան ոստիկան էր բարիկադների մյուս կողմում: Հետո, հակադարձելով այդ դիտարկմանը, նա հիշատակեց, որ նման խոսակցություններ եղել են նաև ՀՀ ոստիկանապետ Վարելի Օսիպյանի և ԱԱԾ տնօրեն Արթուր Վանեցյանի մասին, սակայն հիմա հանրությունը նրանց ողջունում է:
«Պարո՛ն Պողոսյան, ես հույս ունեմ, որ երբ հաջորդ անգամ գամ, մարդիկ ձեզ նույնպես այդպես ողջունեն Կապանում և Սյունիքի մարզի այլ քաղաքներում», - ասաց նա:
Նիկոլ Փաշինյանը նաև հրապարակում հայտնեց, թե ինչ հանձնարարություններ է տվել Սյունիքի նոր մարզպետին․ապահովել օրինականությունը, նոր ներդրողների համար պայմաններ, որ յուրաքանչյուր պոտենցիալ ներդրողի հետաքրքրությունը դառնա իրականություն, նոր ներդրումներ, նոր աշխատատեղեր և ապահովել սյունեցիների ազատությունը պոտենցիալ օլիգարխական վտանգների, կրիմինալի և այլ կարգի ճնշումներից:
«Հիմա ասելու են՝ Հունան Պողոսյանը պե՞տք է ապահովի: Այո՛, որովհետև նա նշանակված է ժողովրդի կառավարության կողմից: Այլ կերպ լինել չի կարող», - ասաց նա:
Նիկոլ Փաշինյանը նաև անդրադարձավ 2013թ. Հունան Պողոսյանի մասին արած իր հայտարարությանը, որը վերաբերել է նախկին փոխոստիկանապետի և Շանթ Հարությունյանի միջև եղած միջադեպին:
Նշեց, որ ինքը հիմա անհարմար վիճակում է գտնվում այդ հայտարարության պատճառով: Պատմեց, որ այն ժամանակ դա արել է՝ հիմնվելով իր «բարեկամ» Շանթ Հարությունյանի խոսքերի վրա: Սակայն հետո այդ միջադեպի հետ կապված ցուցմունքներում Շանթ Հարությունյանը որևէ բացատրություն չի տվել: «Ես միջնորդել եմ, որ իրավապահ մարմինները նորից քննեն այդ գործը, և Հունան Պողոսյանի պատասխանատվությունն ու պարտականությունը կլինի այդ քննության ժամանակ ամբողջ ճշմարտությունը պատմելը», - ասաց նա, հետո հավելեց, - «Որպես վարչապետ՝ հարց եմ տվել Հունան Պողոսյանին այդ միջադեպի հետ կապված, և ստացել եմ պատասխան: Չեմ ասի, թե ինչ պատասխան է եղել, բայց այն ինձ բավարարել է»: