Kürbedinov: Keriç faciası – «Qırımdaki Rusiye telükesizliginiñ muvafaqiyetsizligidir»

Keriç politehnik köllecindeki kütleviy öldürüv – «Qırımda terrorizmge qarşı telükesizlikni temin eteceklerniñ muvafaqiyetsizligidir». Böyle bir fikirni qırımlı advokat Emil Kürbedinov Qırım.Aqiqatqa seslendirdi.


Kürbedinovnıñ aytqanına köre, Rusiye mahsus hızmetleri «yarımadada qabaatsız qırımtatarlarnı tutmaq içün o qadar vaqıt sarf etip, kerçek telükeniñ ögüni almaq içün bir şey yapmadı».


«Tünevinki facia Qırımda terrorizmge qarşı telükesizlikni temin eteceklerniñ tam bir muvafaqiyetsizligini kösterdi. Anda Qırım yolbaşçısı degil, Qırımda terrorizmge qarşı tedbirlerni temin etken diger hızmetniñ reberi olmaq kerek edi. Keriçteki facia yerinde insanlarnıñ közüne baqmaq kerek edi», – dedi advokat.


Keriçteki kütleviy öldürüvde elâk olğanlarnıñ tolu cedveli derc etilgen edi. Daa soñra belli oldı ki, Keriçteki ücüm neticesinde elâk olğanlarnıñ sayısı 21-ge arttı.


Patlav çarşenbe künü Keriç politehnik kollecinde oldı. Rusiyeniñ terrorizmge qarşı milliy komiteti, kollecde bomba patlağanını bildire.


Rusiye Tahqiqat komitetiniñ malümatına köre, Keriç politehnik kollecinde olğan patlavnı 4-ünci kurs studenti, 18 yaşında Vladislav Roslâkov kerçekleştirdi. O, «özüni öldürdi».


Qırım Muhtar Cumhuriyetiniñ prokuraturası Keriç politehnik köllecinde olğan patlavnı terror ücümi olaraq tasnif ete.