Ўзбек мактабларида электрон журнал ва кундаликлар жорий этилади

Ўзбекистон умумтаълим мактабларида электрон журнал ва кундаликлар пайдо бўлади. Ушбу лойиҳа билан Ўзбекистон Халқ таълим вазирлиги ва Россиянинг умумтаълим технологиялари соҳасида фаолият юритадиган “Дневрик.ру” IT-компанияси шуғулланади, дея хабар беради вазирлик сайти. Халқ таълими вазирлигининг сайтида 2018 йил 6 августда эълон қилинган АКТни жорий этиш йўлида давлат-хусусий шерикчилиги кўринишида ҳамкорлик қилиш таклифига асосан келиб тушган аризаларни ўрганиш натижасида Россия компаниясининг ташаббуси маъқулланди. Ушбу лойиҳани амалга оширишда “Дневник.ру“нинг Ўзбекистондаги вакили “Kundalik” компанияси иштирок этади ва барча харажатларни ўз зиммасига олган ҳолда мазкур тизимни жорий қилиш, фаолиятини таъминлаш ва ривожлантириш ишларини олиб боради. “Kundalik” лойиҳаси Ўзбекистондаги мактабларда фанларни ўзлаштириш даражаси ва давоматни қайд этиш тизимини жорий этишга қаратилган. Тизим онлайн тарзда ўқитувчиларни дарсларини режалаштириш, дарс жадвалларини тузиш, ўқувчиларнинг ўзлаштириш даражаси ва давоматини электрон журнал ва кундаликларда қайд этиб бориш, шунингдек, таълим бошқарув органлари ва муассасаларга статистик ҳисоботларни шакллантириш учун хизмат қилади. Компания сайтида келтирилишича, тизимнинг фаоллаштириш коди мактабдаги барча ўқувчи ва ўқитувчиларга берилади, улар шу код орқали ягона тармоққа уланадилар ва ўзларининг шахсий саҳифаларини тузадилар. Ҳар ким ўзига мос аккуант пунктига эга бўлиши мумкин: ўқитувчи уй вазифаларини бериши, дарс жадвалларини илиши, реал ва виртуал бажарилган вазифалар учун электрон кундаликка баҳо қўйиши мумкин ва ҳ.к. Ўқувчилар эса форум орқали ўзаро мулоқотда бўлиши, уй вазифаларини бажариши, синф бўйича медиамаълумотлар билан танишиши, шунингдек қўшимча материал ва сервислардан фойдаланишлари мумкин. «Дневник.ру» компаниясининг бош директори Гавриил Леви Kundalik Ўзбекистон ва Россия алоқаларини ривожлантиришдаги муҳим лойиҳалардан бири бўлиб қолишини айтди. Халқ таълими вазири ўринбосари Сарвар Бабаходжаев лойиҳа ҳақида шундай деди: “Халқ таълими вазирлигининг асосий вазифаларидан бири ўқитувчилар иши учун қулай шароит яратишдир. Замонавий технологияларни жорий этган ҳолда биз мактабларда қоғоз ҳисоботларни камайтириш ва ўқитувчиларга бу билан боғлиқ юкни сезиларли даражада камайтиришни мақсад қилганмиз. Шу билан бирга, биз ўқув жараёнини бошқариш ва ўқувчиларнинг ўзлаштириш ҳамда давомати бўйича объектив ҳисоботларни шакллантиришга кўмак берувчи воситага эга бўламиз”. Июнь ойида мамлакат президенти Шавкат Мирзиёев ўқитувчиларни ортиқча қоғозбозлик ишларидан халос қилишга буйруқ берганди. Ўша пайт Халқ таълим вазири этиб тайинланган Шерзод Шерматов чеки кўринмайдиган ҳисоботларни ёзиш “маориф тизимидаги энг ёмон касалликлардан бири экани”га эътибор қаратди, зеро ўқитувчининг касбий фаолиятига дахлдор бўлмаган чексиз текширувлар, қоғозларни тўлдириш ишлари ҳар куни ўқитувчининг тўрт соат вақтини олади ва бу ишлар учун унга ҳақ тўланмайди. Октябрь бошида таълим соҳасини ислоҳ қилиш мақсадида АҚШ тажрибасини ўрганиш учун Шерматов океан орти мамлакатига ташриф буюрди ва Вашингтонда мутахассислар билан музокаралар олиб борди. “Фарғона” халқаро ахборот агентлиги