Ալավերդու պղնձաձուլական գործարանը դադարեցրեց աշխատանքը, ի նշան բողոքի՝ արդեն նախկին աշխատողները փակել են Վրաստան տանող մայրուղին
«Վալլեքս» խմբի՝ ՎՏԲ բանկին ունեցած խոշոր պարտքի դիմաց գործարանն անցել է ռուսաստանյան այս բանկին։ Մեկ ամիս առաջ «Վալլեքս» խումբը կորցրել էր նաև Թեղուտում շահագործվող հանքավայրը։
Չնայած ընկերության համար ստեղծված ֆինանսական խնդիրներին, մեկ շաբաթ առաջ գործարանում տեղի էր ունեցել հանրային քննարկում, որտեղ գործարանը շահագործող Էյ-Սի-Փի ընկերությունը վերջնագիր էր փոխանցել կառավարությանը՝ նշելով, որ իրենց երեք պահանջները չբավարարելու դեպքում կդադարեցնեն աշխատանքը։
Բնապահպանական խախտումների համար մեկ ամիս առաջ 387 միլիոն դրամով տուգանված ընկերությունը կառավարությունից պահանջել էր չեղարկել տուգանքն ու 6-7 անգամ բարձրացնել արտանետումների սահմանային թույլատրելի նորմերը։
Այս շաբաթ փոխվարչապետ Տիգրան Ավինյանն ու ընկերության սեփականատեր Վալերի Մեջլումյանը բանակցել են։ Փաստորեն արդյունք չտված բանակցությունների մասին դեռևս պաշտոնական հաղորդագրություն չկա։
Այսօր գործարանի աշխատակիցներն արդեն ծանուցում են ստացել աշխատանքից ազատվելու մասին, որից հետո փակել են դեպի Վրաստան տանող մայրուղին՝ ի նշան բողոքի։