Հայկ Մարության․ Վերջապես ունեցանք իրոք քարոզարշավ
«Պետք ա առաջին հերթին լուծենք այս խնդիրը, որովհետև, երբ ման էկանք շրջաններով, հասկացանք, որ սա ամենաարդիական և ամենալուրջ խնդիրն է, որ էս պահին կա, որը պետք է օր առաջ լուծել», - «Ազատության» հետ զրույցում ասաց Մարությանը: - «Աղբահանության հարցով միանգամից զբաղվելու ենք: Եվ վստահաբար վեց ամսվա մեջ պետք է տեսնենք արդյունքեր: Մնացած հարցերը մի քիչ ավելի լոնգ-տերմ են»:
Վարչապետ Նիկոլ Փաշինյանի «Քաղաքացիական պայմանագիր» կուսակցության անդամ Մարությանն այսօր «Իմ քայլը» դաշինքի ավագանու թեկնածուների հետ քայլերթ-քարոզարշավը իրականացնում է Կենտրոն վարչական շրջանում։
Երկու շաբաթ տևած քարոզարշավը, ըստ նրա, աննախադեպ էր նորանկախ Հայաստանի պատմության մեջ․ - «Ստացվեց ունենալ վերջապես․․․ իրոք քարոզարշավ, ոչ թե ինչ-որ նախօրոք պայմանավորվածությունների իրականացում: Սա իրական քարոզարշավ էր, երբ բոլոր քաղաքական ուժերը հավասար պայմաններում պայքարում էին ամեն քվեի համար, բոլորը ունեին հնարավորություն թե՛ հեռուստատեսության առումով, թե՛ կայքերի առումով»:
Հեռուստադիտողներն այդպես էլ չեն տեսնի Հայկ Մարութանի և այս ընտրություններում նրա թերևս ամենասուր քննադատ Նաիրա Զոհրաբյանի բանավեճը։
Թեև քարոզարշավի ավարտին դեռ մի քանի ժամ կա, «Իմ քայլը» դաշինքի առաջնորդը նշում է, որ «Բարգավաճ Հայաստան» կուսակցության քաղաքապետի թեկնածուի հետ առանձին դեբատի չի գնա, քանի որ ընտրություններում իրեն մրցակից է համարում բոլոր մասնակիցներին․ - «Մենք ոչ մեկին նախապատվություն չենք տալիս, ոչ մեկին չենք առանձնացնում: Ես ունեմ 11 օպոնենտ, 11 գործընկեր, և ինչու պետք է խտրականություն լինի մնացածի հանդեպ: Առաջարկը կար 12-ով հավաքվելու․․․ Անենանեյտրալ՝ Հանրային հեռուստաընկերությունը կազմակերպեց բանավեճը, սկզբից կար պայմանավորվածություն, որ պետք է բոլորը գան, այնուհետև հրաժարվեցին որոշ մասնակիցներ: Այնուամենայնիվ բանավեճը կայացել է․․․ Մարդիկ ասում են՝ եկեք անենք, բայց երբ պահը գալիս է, ասում են, վայ, գիտեք ինչ կա, չենք գալիս»:
Մարությանը վստահ է, որ այս կիրակի կայանալիք Երևանի ավագանու ընտրությունները նույնպես աննախադեպ կլինեն վերջին տասնամյակների համար։
Սիրված դերասանը փոքր-ինչ ցավով նշեց, որ ընտրվելու դեպքում հեռոստաէկրաններին «կարգին Հայկոն» այլևս չի լինի․ - «Օրենքը ինձ թույլ է տալիս, բայց չեմ կարծում, թե ժամանակ կունենամ զբաղվելու»: