Судење зад затворени врати на чеченскиот активист Титиев

Рускиот Центар за човекови права „Меморијал“ соопшти дека судија во Чеченија наредил постапка зад затворени врати во судењето на Ојуб Титиев, еден од водечките активисти за човекови права во Русија.


Прес-службата на „Меморијал“ денеска соопшти дека судијата во Градскиот суд во градот Шали во Чеченија го одобрил барањето на обвинителот за затворени рочишта на 61-годишниот шеф на канцеларијата на „Меморијал“ во Чеченија.


Обвинителот тврди дека документите во случајот на Титиев содржат државни тајни и побара некои сведоци да бидат испрашувани зад затворени врати „за да спречат откривање на лични податоци“ за одредени службеници. „Меморијал“ соопшти дека очекуваат судењето повторно да биде отворено за јавноста откако ќе сведочат одредени сведоци.


Адвокатот на Титиев, Пјотор Заикин, денеска изјави дека затворањето на судењето за јавноста ги крши правата на Титиев според Конвенцијата за заштита на човековите права и фундаменталните слободи.


Титиев е во притвор од јануари кога беше уапсен за обвиненија за дрога, отаклкао полицијата во Чеченија соопшти дека пронашла пластична кеса со околу 180 грама марихуана во неговиот автомобил.


Титиев инсистира дека дрогата била ставена во неговиот автомобил како доказ против него. Доколку биде осуден, се соочува со максимална казна од 10 години затвор.