Եղան հակաքարոզչության առանձին դեպքեր, բայց դրանք չեն նսեմացնում ընդհանուր պատկերը. ՕԵԿ-ն ամփոփեց քարոզարշավը
«Օրինաց Երկիր» կուսակցությունը Երևանի ավագանու ընտրությունների նախընտրական քարոզարշավն ամփոփեց Երևանի Նուբարաշեն համայնքում:
«Արմենպրես»-ի փոխանցմամբ` կուսակցությունը սեպտեմբերի 21-ի նախընտրական օրը սկսել է Երևանի Սուրբ Սարգիս եկեղեցու բակից` քայլերթով, ապա այն շարունակել Նուբարաշենի Սրբոց նահատակաց եկեղեցու բակում:
Կուսակցության նախընտրական ցուցակի առաջին համար Մհեր Շահգելդյանի խոսքով` իրենք քարոզարշավի ընթացքը դրական են համարում:
«Բոլոր քաղաքական ուժերը, յուրաքանչյուրն իր տարբերակով, կարողացան ներկայացնել իրենց ծրագրերն ու մոտեցումները: Իհարկե, եղան հակաքարոզչության առանձին դեպքեր, բայց դրանք չեն նսեմացնում ընդհանուր պատկերը: Այս քարոզարշավի ընթացքում մեր այցելությունները, հանդիպումները, մոտեցումներն ու հետաքրքրությունը թույլ են տալիս մեր հնարավորությունները բարձր գնահատել»,- ասաց Շահգելդյանը:
Կուսակցությունը Նուբարաշեն համայնքում բազմաթիվ խնդիրներ է տեսնում, սակայն դրանցից առաջնայինը աղբանոցի խնդիրն է համարում:
«Աղբանոցի խնդիրը տարիներ շարունակ չի լուծվում՝ չնայած արտասահմանյան կազմակերպությունների ներդրումների առաջարկություններին: Սա առաջնային խնդիր է, որը լուծում է պահանջում, և մենք մեր ուժերն ամբողջությամբ ներդնելու ենք` համագործակցելով նաև այլ քաղաքական ուժերի հետ, որոնք նույնպես բարձրաձայնում են այս խնդիրը: Մի շարք այլ հիմնախնդիրներ նույնպես կան՝ կապված տրանսպորտի հետ, և այս հարցը նույնպես լինելու է մեր ուշադրության կենտրոնում»,- նշեց ՕԵԿ-ի քաղաքապետի թեկնածուն:
Ավագանու «Օրինաց Երկիր» կուսակցության թեկնածուները շրջեցին Նուբարաշեն համայնքի փողոցներով ու բնակիչներին ներկայացրին իրենց նախընտրական ծրագրերը: