Հայ-թուրքական սահմանը հատած 16-ամյա թուրք տղայի հայրը կժամանի Հայաստան՝ որդուն տանելու․ Ermenihaber
Հուլիսի 24-ին հայ-թուրքական սահմանը հատած 16-ամյա Ումութ Ալի Օզմենի հայրը՝ Մուստաֆա Օզմենը, հայտնել է, որ որդին ազատ է արձակվելու, և նա պատրաստվում է սեպտեմբերի 24-ին գալ Հայաստան՝ տղային տանելու: Այդ մասին նա ասել է ermenihaber.am-ին տված հարցազրույցում։
«Որդիս տուն է գալիս: Ինձ Հայաստանից փաստաբանը զանգահարեց և ասաց, որ որդիս «արդարացվել» է, կարող եմ գալ և տանել: Երկուշաբթի Հայաստանում կլինեմ: Շնորհակալ եմ բոլոր նրանց, ովքեր ջանք գործադրեցին որդուս վերադարձն ապահովելու համար»,-ասել է Մուստաֆա Օզմենը:
Նախօրեին Հանրային հեռուստաընկերության «Լուրեր» լրատվականին տված հարցազրույցում տղայի հայրը նրան վերադարձնելու խնդրանքով դիմել էր Հայաստանի կառավարությանը և վարչապետին՝ խնդրելով ներողամիտ լինել, ու նշել, որ երեխան պատահմամբ է անցել սահմանը։
«Հայաստանի կառավարությանը և երկրի ղեկավարին աղաչում եմ, որ իմ երեխային որքան հնարավոր է շուտ բաց թողնեն, վերադարձնեն իր ընտանիքին՝ Թուրքիա, որքան հնարավոր է շուտ վերադառնա իր սովորական կյանքին՝ դպրոց, քոլեջ: Իր մայրն աղաչում է, որ օգնեք հետ վերադարձնեն մեր տղային: Այս անհանգիստ վիճակից նա առողջապես վատ վիճակում է»- ասել էր հայրը։