Жаҳон антидопинг агентлиги RUSADA фаолиятини қайта тиклашга рухсат берди
WADA президенти Крейг Риди ташкилот ижроия кенгашининг 12 аъзосидан асосий кўпчилиги 20 сентябрда Сейшел оролида ўтган саммитда RUSADA фаолиятини тўхтатиш тўғрисида уч йил олдин қабул қилинган қарор бекор қилиниши учун овоз берганини айтди.
Мазкур ташкилот фаолияти тўхтатилишига Россия спортчилари катта миқдорда допинг истеъмол қилганига RUSADA кўз юмиб келгани борасидаги иддаолар ортидан юзага келган жанжал сабаб бўлганди.
RUSADA бош директори Юрий Ганус Москвада ўтган матбуот анжуманида WADA қарорни олқишлади:
-Бу анча сезиларли бўлган биринчи қадамдир ва бу қадам спортчиларимиз ҳамда федерацияларимизга халқаро мусобақаларда иштирок этишга, Россия ҳудудида халқаро мусобақаларнинг ўтказилишига туртки бўлади,-деди Ганус.
Айни пайтда WADA RUSADA олдига қатор талаблар қўйилганини ҳам билдирди. Жумладан, Россия антидопинг агентлиги 2018 йилнинг охиригача халқаро экспертларга допинг бўйича Москва лабараторияларига киришга рухсат бериши лозим.
RUSADA фаолияти 2015 йилда допинг жанжали ортидан тўхтатилган эди. Ўшанда WADA ўз терговни ўтказиб, рус спортчиларининг допинг истеъмол қилиши бўйича ҳукумат лойиҳаси мавжудлигини иддао қилган. Бироқ Россия ҳукумати бу маълумотларни инкор этган. Шундан сўнг Россия халқаро мусобақалардан четлаштирилган эди.