Սփյուռքի նախարարության կրճատման հարց չկա օրակարգում. նոր պատկերացումներ, անելիքներ կան. Մ. Հայրապետյանը՝ վարչապետի հայտարարության մասին
Այս պահին սփյուռքի նախարարության կրճատման հարց չկա օրակարգում, այս մասին այսօր կայացած մամուլի ասուլիսին ասաց սփյուռքի նախարար Մխիթար Հայրապետյանը՝ անդրադառնալով վարչապետի՝ նախարարությունների կրճատման հայտարարությանը:
«Նման հարց չկա օրակարգում, բայց ցանկացած որոշում, որը կառավարությունը կկայացնի որևէ նախարարության մասով, բացառապես ելնելու է հայ ժողովրդի՝ ինչպես Հայաստանի Հանրապետությունում բնակվող, այնպես էլ սփյուռքում բնակվող մեր հայրենակիցների շահերից»,- նշեց Մխիթար Հայրապետյանը:
Հիշեցնենք, որ վարչապետ Նիկոլ Փաշինյանը օգոստոսի 17-ին կառավարության 100 օրվա գործունեությանը նվիրված հանրահավաքին հայտարարել էր պետական ապարատի օպտիմալացման, նախարարությունների կրճատման մասին:
Հարցին, թե պնդելու եք, որ Սփյուռքի հարցերով զբաղվող կառույցը լինի նախարարություն, Մխիթար Հայրապետյանը պատասխանեց. «Եթե ես՝ որպես Սփյուռքի նախարար, այստեղ եմ այն համոզմամբ, որ նախարարությունն անելիք չուներ, ես չէի լինի այստեղ: Սփյուռքի նախարարությունն իր նոր մոտեցումներով, նոր պատկերացումներով ունի անելիք»,- ասաց նա:
Նախարարի խոսքով, սակայն, գերատեսչությունում օպտիմալացում՝ վարչությունների կրճատում պետք է լինի:
«Կառուցվածքային առումով, անշուշտ, լուրջ փոփոխությունները նախարարությունում անխուսափելի են, որովհետև ստորաբաժանումների գործառույթները հաճախ համընկնում են: Շուտով կիմանաք նաև ռեստրուկտուրիզացիայի վերաբերյալ մեր քայլերի մասին»,- հայտնեց նա: