100 օրում ոստիկանությունը հանցագործության մասին 13 215 հաղորդում է ստացել, իսկ 6-րդ վարչությունը բացահայտել է պետությանը պատճառված 4.4 մլրդ դրամի վնաս. ոստիկանության շտաբի պետ (տեսանյութ)
ՀՀ ոստիկանապետ Վալերիյ Օսիպյանն այսօր լրատվամիջոցների հետ հանդիպմամբ ամփոփում է իր պաշտոնավարման 100 օրը:
Նախքան ոստիկանապետին ուղղված հարցերը ՀՀ ոստիկանության շտաբի պետ Արմեն Ղուկասյանը ներկայացրեց ամփոփ հաշվետվություն Վալերիյ Օսիպյանի պաշտոնավարման ընթացքում ոստիկանությունում կատարված աշխատանքների վերաբերյալ:
«100 օրը փոքր ժամանակ է 100 տոկոսանոց փոփոխություն համար, սակայն բավարար ժամանակ է կատարվող փոփոխություններին պատրաստ կատարողունակ թիմ ունենալու համար:
Գործողություններ են իրականացվել ոստիկանության գրեթե բոլոր ոլորտներում, մայիսի 10-ից օգոստոսի 20-ն ընկած ժամանակահատվածում 12 տոկոսով հանցագործությունների թիվն աճել է, շեշտեմ՝ գրանցված թիվը: Սա մի կողմից ոստիկանության նկատմամբ վստահության արդյունքն է ու հանցագործությունները չթաքցնելու միտումը:
Ոստիկանությունը հանցագործությունների վերաբերյալ 13215 հաղորդում է ստացել, նույն ժամանակահատվածում 2017-ին ստացվել է հանցագործության մասին 9730 հաղորդում:
Այս ընթացքում 746 կոռուպցիոն բնույթի հաղորդում է ստացել, որից 585-ն ի հայտ է բերվել հենց ոստիկանության կողմից, առաջընթացն ակնհայտ է նաև լատենտային հանցագործությունների ոլորտում»,- ասաց Ղուկասյանը:
Նրա տեղեկացմամբ՝ միայն Հանցավորության դեմ պայքարի գլխավոր վարչությունում բացահայտվել է պետությանը պատճառված 4,4 մլրդ դրամ վնասի մասին, որից 147 մլն դրամն արդեն վերականգնված է:
Ոստիկանության շտաբի պետի խոսքով՝ վարչապետի հանձնարարությամբ ոստիկանությունը մշակել է մի շարք տուգանքների համաներման մասին օրենքի նախագիծ և շուրջ 150000 անձ ազատվել է տուգանքի վճար վճարելուց, բացի դրանից, ՃՈ-ն կատարել է մի շարք փոփոխություններ տուգանումների հետ կապված:
Անդրադառնալով ոստիկանության հասարակայնության հետ կապի և լրատվության վարչության գործունեությանը՝ Արմեն Ղուկասյանն ասաց, որ նշված վարչությունը տասնյակ պարզաբանումներ է տվել հասարակությանը հետաքրքրող հարցերի վերաբերյալ: