«Սարսափելի սխալ են գործում»․ Թրամփը պատմել է քահանա Բրանսոնի հետ կապված իր ու Էրդողանի պայմանավորվածության մասին
Միացյալ Նահանգների նախագահ Դոնալդ Թրամփը բացառիկ հարցազրույց է տվել բրիտանական Reuters գործակալությանը, որի ժամանակ անդրադարձել է նաև Թուրքիայի հետ լարված հարաբերություններին։
Թրամփը հաստատել է ավելի վաղ լրատվամիջոցներում տարածված լուրը, համաձայն որի նա և Թուրքիայի նախագահ Ռեջեփ Թայիփ Էրդողանը ներքին պայմանավորվածություն են ունեցել․ ԱՄՆ առաջնորդը պետք է միջնորդեր Իսրայելում կալանավորված Թուրքիայի քաղաքացի Էբրու Օզքանի ազատ արձակման հարցում, իսկ Էրդողանը դրա դիմաց ազատություն տար ամերիկացի քահանա Էնդրյու Բրանսոնին։ Մինչդեռ Էրդողանը խախտել է խոստումը։
«Ես նրա համար եմ դուրս բերել այդ անձին բանտից։ Եվ սպասում եմ, որ Էրդողանը թույլ տա դուրս գալ Թուրքիայից այդ անմեղ ու հրաշալի մարդուն, մեծ հայր և քրիստոնային», - ասել է Թրամփը։
Նա խոստովանել է, որ կարծում էր, թե համաձայնության է եկել Էրդողանի հետ, սակայն սխալվել է։
«Քահանա Բրանսոնի հարցում Թուրքիայի ցուցաբերած դիրքորոշումը տխրեցնող է։ Ըստ իս՝ սարսափելի սխալ են գործում։ Ես սիրում եմ Թուրքիան, սիրում եմ թուրք ժողովրդին, Էրդողանի հետ մինչ օրս շատ լավ հարաբերություններ ունեինք։ Սակայն միակողմանի հարաբերություն չի լինում։ ԱՄՆ-ի համար այլևս չկան միակողմանի հարաբերություններ», - ասել է Թրամփը։
Հիշեցնենք, որ Բրանսոնն ու նրա կինը, որոնք Իզմիրում ղեկավարում էին քրիստոնեական եկեղեցի, կալանավորվել են միգրացիոն օրենսդրության խախտման մեղադրանքով: Կինն ավելի ուշ ազատ է արձակվել։
Բրանսոնին նաև մեղադրանք է առաջադրվել «Քրդստանի աշխատավորական կուսակցության», ինչպես նաև Թուրքիայում հեղաշրջման փորձի համար մեղադրվող թուրք կրոնական քարոզիչ Ֆեթուլլահ Գյուլենի «Հիզմեթ» խմբավորման հետ կապեր ունենալու համար:
Նրան սպառնում է մինչև 35 տարվա ազատազրկում: