Եվգենի Պետրոսյանն ու Ելենա Ստեպանենկոն չեն ներկայացել ամուսնալուծության գործով դատական նիստին
Հայտնի երգիծաբաններ Եվգենի Պետրոսյանն ու Ելենա Ստեպանենկոն չեն ներկայացել Մոսկվայի Խամովնիչեսկի դատարան, որտեղ օգոստոսի 13-ին քննվում է իրենց ամուսնալուծության ու համատեղ ունեցվածքը կիսելու հարցը, հայտնում է ria.ru-ն:
Նիստի ժամանակ նրանց շահերը ներկայացնելու են փաստաբանները: Պետրոսյանի փաստաբանն ակնկալում է, որ կողմերին կհաջողվի խաղաղ պայմաններում համաձայնության գալ:
Հավելենք, որ նիստն արդեն մեկնարկել է ու ընթանում է փակ դռների հետևում:
Հիշեցնենք, որ Ստեպանենկոն, առաջին անգամ մեկնաբանելով ամուսնալուծվելու և համատեղ ունեցվածքը կիսելու տեղեկությունը, ընդգծել էր, որ «ինչպես դատարանը որոշի, այնպես էլ կլինի»:
Ստեպանենկոն նշել էր, որ հանգիստ է վերաբերվում ստեղծված իրավիճակին՝ նկատելով, որ «դա կենցաղային հարց է»:
«Յուրաքանչյուր մարդու կյանքում ինչ-որ բան պատահում է: Իմ ու Եվգենի Վահանիչի դեպքում տեղի ունեցավ ամուսնալուծություն, բայց դա կենցաղային հարց է: Դե հիմա այդպես է պատահել: Ամեն ինչ կլինի դատարանի վճռով. ինչպես դատարանը որոշի, այդպես էլ կլինի»,- շեշտել է կինը:
Ինչ վերաբերում է Պետրոսյանին, ապա նա լրագրողների հետ զրույցում ասել է, որ Ստեպանենկոյի հետ լավ հարաբերությունների պահպանման հույս ունի:
Հիշեցնենք, որ Մոսկվայի Խամովնիչեսկի դատարանը կալանք է սահմանել Պետրոսյանի ու Ստեպանենկոյի անշարժ գույքի նկատմամբ: Խոսքն այն գույքի մասին է, որը նրանք պետք է կիսեն ամուսնալուծության գործընթացի շրջանակում:
Օգոստոսի 6-ին Խամովնիչեսկի դատարանում կայացել էր Պետրոսյանի ու Ստեպանենկոյի համատեղ ունեցվածքը կիսելու գործով առաջին դատական նիստը, որին նրանք ներկա չէին եղել:
Աստղային զույգի համատեղ անշարժ գույքը գնահատվել է մոտ 1 միլիարդ ռուբլի:
Հումորիստների շահերը պաշտպանողների խոսքերով՝ Պետրոսյանը պատրաստ է իրենց համատեղ հարստությունը հավասար կիսել, սակայն Ստեպանենկոյին դա չի բավարարում, ու նա հավակնում է դատարանի միջոցով ստանալ ունեցվածքի 80%-ը:
Պետրոսյանի փաստաբանը մանրամասնել է, որ զույգը, պաշտոնապես ամուսնալուծված չլինելով հանդերձ, վերջին 15 տարվա ընթացքում միասին չի ապրում և որ տվյալ մեկ միլիարդ ռուբլու անշարժ գույքը ձեռք է բերվել այն տարիներին, երբ նրանք այլևս միասին չէին:
Փաստաբանի խոսքով, երբ Պետրոսյանն իրեն դիմել է՝ խնդրել է Ստեպանենկոյի հարցում որևէ խորամանկ քայլի չդիմել, ամեն ինչ անել պարզ, որպեսզի իրենք հետագայում ստեղծագործական ոլորտում կարողանան միասին աշխատել:
«Մեր նպատակն է ամեն ինչ անել քաղաքակիրթ ձևով ու առանց աղմուկի, բայց Ստեպանենկոյի շրջապատում կան մարդիկ, որոնք վստահեցնում են, որ կարող են Պետրոսյանից ամեն ինչ խլել, և նա նրանց հավատում է»,-նշել է փաստաբանը:
Պետրոսյանն ու Ստեպանենկոն ամուսնացած են 30 տարի, ու այս ընթացքում նրանք ձեռք են բերել 5 բնակարան Մոսկվայի կենտրոնում, քառահարկ առանձնատուն, անտիկվար իրերի, մեքենաների հավաքածուներ ու այլ թանկարժեք իրեր:
Հիշեցնենք, որ ունեցվածքը կիսելու վերաբերյալ առաջին հայցը ներկայացվել էր Ստեպանենկոյի կողմից: