Սուրեն Պապիկյանն աշխատանքային այցով կմեկնի Սյունիքի մարզ
Տարածքային կառավարման և զարգացման նախարար, ՔՊ անդամ Սուրեն Պապիկյանն այս շաբաթվա ավարտին աշխատանքային այցով կուղևորվի Սյունիքի մարզ։
Այս մասին նախարարը հայտնել է ֆեյսբուքյան իր էջում։
«Մարզի համայնքների կարիքներին ու խնդիրներին վերաբերող դիմում-բողոքները արդեն կարող եք ուղարկել իմ ֆեյսբուքյան էջին կամ s.papikyan@mta.gov.am էլ.հասցեին։ Ձեր մտահոգությունները կբարձրաձայնեմ համայնքի ղեկավարների հետ հանդիպումների ժամանակ։
Տեղեկացնեմ, որ այցիս շրջանակներում հուլիսի 27-ին նախատեսվում է աշխատանքային հանդիպում Արցախի Հանրապետության պետական նախարարի և գյուղատնտեսության նախարարի, ԱԺ պատգամավորների հետ։
Հանդիպումից հետո կմասնակցեմ Վերիշեն-Ակներ վերանորոգված կամուրջի բացմանը ։
Այնուհետև մարզկենտրոնում անցկացվելիք խորհրդակցության ժամանակ կներկայացնեմ Կապանի քաղաքապետի պաշտոնակատարին։
Հաջորդ երկու օրերին մի շարք համայնքներում համայնքների ղեկավարների, ավագանու, վարչական ներկայացուցիչների և բնակիչների հետ կունենանք ճանաչողական հանդիպումներ, որոնց ընթացքում կքննարկենք համայնքային խնդիրների լուծման ուղիները»,– գրառման մեջ նշել է Սուրեն Պապիկյանը։