ՀՀ-ին անհրաժեշտ է ԱՄՆ-ի իշխանությունների հետ հանդիպումը՝ երկկողմ հարաբերություններում պատշաճ մակարդակ ապահովելու համար․ միջազգայնագետ
Միջազգայնագետ Սուրեն Սարգսյանի խոսքով՝ Փաշինյան-Թրամփ հանդիպումը կազմակերպելը հնարավոր է և ցանկալի: Նա Tert.am-ի հետ զրույցում նկատեց՝ նման կարգի հանդիպում՝ երկրների առաջին դեմքերի մակարդակով, վերջին մոտ տասը տարիների ընթացքում չի եղել:
«Եթե կա հնարավորություն, եթե կա օրակարգային հարց քննարկելու համար, բնական է, պետք է կազմակերպել Փաշինյան-Թրամփ հանդիպումը»,- ասաց նա:
Հիշեցնենք, որ ԱՄՆ-ում ՀՀ արտակարգ և լիազոր դեսպան Գրիգոր Հովհաննիսյանը հայտարարել էր, որ Փաշինյան-Թրամփ հանդիպման հարցը Պետքարտուղարության գործընկերների հետ քննարկման օրակարգում է:
Միջազգայնագետը նկատեց, որ հանդիպումը նախատեսվում է կազմակերպել սեպտեմբեր-հոկտեմբեր ամիսներին՝ ՄԱԿ-ի գլխավոր Ասամբլեայի հերթական նստաշրջանին:
«Նստաշրջանին լինելու է վարչապետ Նիկոլ Փաշինյանը: Դրա մասին հայտարարվել է: Դա հարմար հարթակ է, որ Փաշինյան-Թրամփ առաջին հանդիպումը տեղի ունենա,- ասաց նա՝ նշելով, որ հանդիպումը դրական ազդեցություն կունենա կողմերի համար՝ երկու երկրների նոր իշխանությունների հետ շփման տեսանկյունից,- Թրամփն էլ է նոր իշխանության եկել՝ 1․5 տարի, Հայաստանի հին իշխանությունների հետ հանդիպում չէր եղել: Սա նոր հնարավորություն է նրանց համար՝ միմյանց ճանաչելու համար»:
Փաշինյան-Թրամփ հանդիպման համար քաղաքական նախապայմաններ կան, երկու կողմերն ունեն միմյանց հետ քննարկելիք օրակարգային հարցեր:
«Օրինակ՝ Հայաստանը կարող է խոսել խաղաղապահ առաքելությունում իր ներգրավվածության բարձրացման հարցի մասին: Դա կարող է լինել ՆԱՏՕ-ի կամ ՄԱԿ-ի խաղաղապահ առաքելության շրջանակներում: Նաև կարող են քննարկվել երկկողմ փոխգործակցության հարցեր, տնտեսական հարաբերությունները, ներդրումային հարցեր և այլն: Պետք է հաշվի առնել, որ Թրամփը բիզնեսմեն է, և տնտեսական հարցերի մասին նրա հետ խոսելը կարևոր է»,- ասաց նա:
Հայաստանին անհրաժեշտ է ԱՄՆ-ի բարձր իշխանությունների հետ հանդիպումը նախևառաջ երկկողմ հարաբերություններում պատշաճ մակարդակ ապահովելու համար:
«Բարձր մակարդակով շփումները, բարձր մակարդակով անձնական հանդիպումները շատ կարևոր են,- ասաց նա՝ նշելով, որ հանդիպումը կազմակերպելու համար ՀՀ իշխանությունները պետք է ամեն ինչ անեն, պետք է աշխատանք տանեն նաև թե՛ մեր լոբբիստները, թե՛ մեր համայնքը,- հայ ամերիկյան հարաբերությունների պոտենցիալը շատ մեծ է, բայց մենք օգտագործում ենք ոչ ամբողջությամբ»:
«Թավշյա հեղափոխության» միջոցով իշխանության եկած Նիկոլ Փաշինյանի անձը ևս, ըստ Սուրեն Սարգսյանի, կարող է դրական ազդեցություն ունենալ հանդիպման կազմակերպումն իրականություն դարձնելու ճանապարհին: Նկատեց՝ ՀՀ նոր իշխանությունները կիսում են ԱՄՆ-ի արժեքները:
Սուրեն Սարգսյանի նկատառմամբ՝ Փաշինյան-Թրամփ հնարավոր հանդիպմանը, այնուամենայնիվ, Հայաստանն իր ուղերձները պետք է փոխանցի՝ մտահոգություններ հայտնելով նաև Լեռնային Ղարաբաղի հիմնախնդրի մասով, քանի որ ԱՄՆ-ը ԵԱՀԿ Մինսկի խումբը համանախագահող երկիր է:
«Հատկապես պետք է հաշվի առնել, որ վերջին շրջանում նաև ադրբեջանաամերիկյան հարաբերություններն են զարգանում տարբեր, այդ թվում՝ ռազմական ուղղությունով: Մեզ համար չափազանց կարևոր է նաև Միացյալ Նահանգների կողմից մեզ տրամադրվող օգնությունը: Գիտենք, որ մինչև 2019 թվական չենք կարող «Հազարամյակների մարտահրավերները» կորպորացիայի ծրագրին մասնակցելու համար դիմել: Իհարկե, կան այլ ոլորտներ ևս, որոնց շուրջ համագործակցություն զարգացնելու ուղղությամբ պետք է աշխատենք»,- ասաց նա: