ՔԿ-ում քրեական գործերի աննախադեպ աճ է գրանցվել, և քննիչները ծանրաբեռնված են աշխատում. ՔԿ նախագահի տեղակալ
2018թ. առաջին կիսամյակի աշխատանքների ամփոփման արդյունքում Հայաստանի քննչական կոմիտեում արձանագրվել է վերջին 4 տարիների համեմատության քրեական գործերի քանակի աննախադեպ աճ, այս մասին ֆեյսբուքյան իր էջում տեղեկացնում է Քննչական կոմիտեի նախագահի տեղակալ Արթուր Ղամբարյանը։
«ՀՀ քննչական կոմիտեի 2018թ. առաջին կիսամյակի աշխատանքների ամփոփման արդյունքում արձանագրվել է վերջին 4 տարիների համեմատության քրեական գործերի քանակի աննախադեպ աճ։ Օրինակ` 2017թ. առաջին կիսամյակում ՔԿ քննվել է 10526 քրեական գործ, իսկ 2018թ. առաջին կիսամյակում` 12622 քրեական գործ, այսինքն` 2096 քրեական գործով ավելի։ Նման պայմաններում էապես բարձրացել է նաև քննիչների միջին ծանրաբեռնվածությունը` նախորդ տարվա առաջին կիսամյակում 23 քրեական գործ, իսկ 2018թ. առաջին կիսամյակ 28 քրեական գործ։ Կարծում եմ` քրեական գործերի քանակը աճելու միտում ունի։
Թեև գիտակցում եմ, որ քանակական փոփոխություններից որակական փոփոխություններին անցնելու դիալեկտիկայի օրենքները ունիվերսալ են, և ցանկացած քանակական փոփոխություն հանգեցնում է համակարգի տարրերի որակական փոփոխության, սակայն հույս ունեմ, որ քրեական գործերի քանակական աճը և քննիչների ծանրաբեռնվածությունը էական բացասական ազդեցություն չեն ունենա քրեական գործերով հանրային ծառայության որակի և արդյունավետության վրա։ Հակառակ դեպքում պետք է շտապել որոնել օրենսդրական լուծումներ` մինչդատական վարույթում հանրային ծառայության որակի բարձրացման ուղղությամբ»,– ասվում է Արթուր Ղամբարյանի գրառման մեջ։