Վաչագան Ղազարյանն ազատ է արձակվել կալանքից. խափանման միջոցը փոխելու դիմաց 1 միլիարդ դրամի գրավը վճարվել է
ՀՀ 3-րդ նախագահ Սերժ Սարգսյանի թիկնազորի պետ Վաչագան Ղազարյանի խափանման միջոցը փոխելու դիմաց գրավը վճարվել է: Այս մասին Tert.am-ին հայտնեց ՀՔԾ մամուլի խոսնակ Մարինա Օհանջանյանը:
Վաչագան Ղազարյանը կալանավորվել էր հունիսի 28-ին, և Վերաքննիչ քրեական դատարանի կողմից խափանման միջոցը փոխելու համար սահմանված գրավի չափ սահմանվել էր 1 մլրդ դրամը:
Հիշեցնենք նաև, որ Վաչագան Ղազարյանը մեղադրվում է ապօրինի հարստացման համար, այսինքն՝ նա ՀՀ բարձրաստիճան պաշտոնատար անձանց էթիկայի հանձնաժողով ներկայացրած հայտարարագրերում թաքցրել է իր ունեցած դրամական միջոցների իրական չափի մասին հայտարարագրման ենթակա տվյալները: Մասնավորապես, ըստ ՀՔԾ-ի, քննությամբ հիմնավորվել է, որ Վաչագան Ղազարյանն իր՝ 2017թ. գույքի, եկամուտների և փոխկապակցված անձանց հայտարարագրում, ինչպես նաև պաշտոնեական պարտականությունները դադարեցնելու օրվա՝ 2018թ. մայիսի 17-ի դրությամբ առկա գույքի, եկամուտների և փոխկապակցված անձանց հայտարարագրում թաքցրել է իր ունեցած դրամական միջոցների իրական չափի մասին հայտարարագրման ենթակա տվյալները, որը հանգեցրել է առանձնապես խոշոր չափերով գույքի՝ 460.000.000 ՀՀ դրամի, 615.268.944 ՀՀ դրամին համարժեք՝ 1.272.900 ԱՄՆ դոլարի և 124.371.180 ՀՀ դրամին համարժեք՝ 218.000 եվրոյի չհայտարարագրմանը:
Նշվում էր, որ հաշվետու ժամանակահատվածում նրա գույքի ավելացումն էականորեն գերազանցել է նրա օրինական եկամուտները և ողջամտորեն չի հիմնավորվում դրանցով, այսինքն` վերջինը ապօրինի հարստացել է:
Վաչիկ Ղազարյանն արդեն ազատ է արձակվել:
Տեղեկատվությունը, թե արդյոք գրավը վճարել են նրա ընտանիքի անդամնե՞րը, փաստաբա՞նը, թե այլք, չհաջողվեց պարզել, նրա փաստաբան Արմեն Հարությունյանը չի պատասխանում հեռախոսազանգերին: