اتن ته نږدې د اور لګېدو په پېښه کې ۵۰ تنه وژل شوي
سیمه ییزو چارواکو ویلي چې د ۲۶ کسانو مړي یې تازه پیدا کړي دي.
تردې مخکې د ۲۴ کسانو مړینه تأیید شوې وه.
اور وژونکو ویلي چې څه باندې سل کسان په دې اور کې ټپيان شوي دي چې د ځینو وضعیت نازک دی او کیدای شي د مړو شمېر زیات شي.
پلازمېنې اتن ته نېږدې دا مرګونی اور په یوه لسیزه کې سابقه نه لري.
د سانتي ګراد په کچه ۴۰ درجې توده هوا او شمال د اور هغه لمبې لا پراخې کړي چې د سختې ګرمۍ له کبله په ځنګلونو کې پیل شوی دی.
اتن ته نېږدې په دې ځنګلي سیمه کې ګڼو خلکو د اوړي رخصتۍ تېرولې.
پخواني معلومات
د يونان چارواکو نن ويلي چې پلازمېنې اتن ته نږدې د اور لګېدو په پېښه کې لږ تر لږه ٢٤ کسان مړه شوي دي.
دا پهدغه هېواد کې تر يوې لسيزې زياته موده کې د اور لګېدنې تر ټولو خونړۍ پېښه ګڼل شوې ده.
د اتن په لوېديځ او ختيځ کې دغه اور پهداسې حال کې ولګېد چې د ګرمۍ درجه ۴۰ سانتي ګرادو ته لوړه شوې وه او تُند بادونه چلېدل.
راپورونه وايي، په اور لګېدنه کې تر ١٠٠ زيات کسان ټپيان شوي چې د ځينو وضعيت نازک دى او چارواکو ويلي چې د مړو شمېر ښايي زيات شي.
د يونان صدراعظم الکسيس څيپراس بوزنيا-هرزګوينا ته خپل سفر لنډ کړ او خپل هېواد ته ستون شو.