Ընտրություններին մասնակցող յուրաքանչյուր կուսակցություն նախապես ներկայացնի իր կառավարության կազմը. Խ. Հարությունյանի՝ ԸՕ-ի առաջարկը
Ազգային ժողովում Ընտրական օրենսգրքի շուրջ ձևավորված ԱԺ աշխատանքային խմբի Հանրապետական խմբակցության պատգամավոր Խոսրով Հարությունյանն անսպասելի օրենսդրական առաջարկ արեց՝ լրամշակվող Ընտրական օրենսգրքում ավելացնել 1 դրույթ, որ ընտրություններին մասնակցելու քաղաքական հայտ ներկայացրած յուրաքանչյուր քաղաքական ուժ, նախապես ներկայացնի իր կառավարության կազմը, որը կունենա հաջողության հասնելու դեպքում:
«Ովքե՞ր են լինելու. փոխվարչապետներ՝ 1-ին, նախարարներ՝ պաշտպանության, առողջապահության, կրթության»,-մանրամասնեց Խոսրով Հարությունյանը՝ նշելով, որ առաջարկվող մոդելը նպաստելու է Հայաստանում ընտրական գործընթացի բարելավմանն ու որակյալ ու ավելի կանխատեսելի քաղաքական համակարգ ունենալուն, այն համակարգաստեղծ է:
Պատասխանելով հարցին, թե ինչո՞ւ է սա կարևոր՝ Խոսրով Հարությունյանը նկատեց, որ նման պարագայում «մասմեդիայի» համար հնարավորություն է ստեղծվում կազմակերպելու նախընտրական առարկայական բանավեճեր տարբեր կուսակցությունների, օրինակ՝ պաշտպանության, առողջապահության, բոլոր նախարարների միջև՝ շատ կոնկրետ ու շատ առարկայական թեմաներով: Իսկ հանրությունն էլ ավելի հեշտ և ավելի շուտ կգնահատի տվյալ քաղաքական թիմերի խոստումների իրականացման հավանականությունը՝ նախապես հետևելով այդ հեռուստաբանավեճերին:
«Արդյոք սա ենթադրո՞ւմ է, որ այն կուսակցությունը, որ չի ցանկանում հրապարակել իր կառավարության կազմը, մենք նրան պետք է զրկենք մասնակցելու իրավունքից: Բացարձակ ոչ: Ուղղակի հանրությունը կփաստի, որ այդ կուսակցությունը որևէ պարագայում չի կարող հավակնել ազդեցիկ կուսակցության դերակատարմանը»,-ավելացրեց Խոսրով Հարությունյանը:
Ըստ նրա՝ առաջարկն ունի հավելյալ «էֆեկտներ», որոնցից մեկը թույլ կտա քաղաքական գործընթացներին ավելի շատ մասնակից դարձնել հանրության քաղաքական, քաղաքացիական, հոգևոր և այլ հատվածների ներուժը, իսկ Հայաստանի քաղաքական համակարգը դարձնել ավելի կանխատեսելի: