Կուսակցությունը դառնում է ավելի պատասխանատու, երբ հրապարակում է կառավարության կազմը նախընտրական փուլում. Խոսրով Հարությունյան (տեսանյութ)

ԱԺ ՀՀԿ խմբակցության պատգամավոր Խոսրով Հարությունյանն առաջարկում է ընտրական նոր մոդել՝ նախընտրական շրջանում ներկայացնել կառավարության ողջ կազմը: Խորհրդարանական քննարկման ժամանակ ՀՅԴ խմբակցության ղեկավար Արմեն Ռուստամյանն ասաց, որ դա համահունչ է խորհրդարանական կառավարմամբ մոդելով երկրներին, բայց այն դեպքում, երբ հնարավորություն կա աշխատելու և´ որպես նախարար, և´ որպես պատգամավոր, իսկ Հայաստանում կա նման արգելք:

«Իսկապես ճիշտ եք: Այս առաջարկը նման համակարգերում, անկասկած, ավելի արդյունավետ կարող էր իրացվել, բայց արդյոք այս համակարգը քաղաքական կարևորությունը կորցնո՞ւմ է, երբ չկա նման հնարավորություն լինելու և´ նախարար, և´ պատգամավոր: Իհարկե, ոչ»,-պատասխանեց Խոսրով Հարությունյանը:

Նա նշեց, որ շատ կարևոր է կառավարության կազմը ներկայացնել նախընտրական փուլում, որպեսզի մարդիկ իմանան, թե ով որ ոլորտի նախարար է, ով ինչպիսի ծրագրեր ու առաջարկներ ունի:

«Ենթադրենք կուսակցությունը հայտարարեց իր ապագա կառավարության կազմը, բայց չարձանագրեց հաջողություն, դարձավ փոքրամասնություն, այդ կուսակցությունը կարող է ձևավորել ստվերային կառավարություն՝ ունենալով հստակ կազմ: Բոլորը ճանաչում են, թե ով է որ ոլորտի նախարարը, նրանք վերահսկում են վիճակը, կարող են այլընտրանքային առաջարկներ կամ ծրագրեր ներկայացնել, քննադատել և քաղաքական իրողությունների փոփոխության պարագայում հանդես գալ սեփական նախաձեռնությամբ»,- ասաց Հարությունյանը:

«Ծառուկյան» խմբակցության պատգամավոր Սերգեյ Բագրատյանն ասաց, որ առաջարկը որպես տեխնոլոգիա կարող է կիրառվել ՀՀԿ-ում, բայց այն չի ընդգրկվում բարեփոխումների համատեքստում: «Մտավախություն ունեք, որ կան ուժեր, որոնք, կաբինետը չներկայացնելով, ամեն դեպքում առավելություն ունե՞ն»,- հարցրեց Ս. Բագրատյանը:

Նա նշեց, որ ինքը նման առաջարկով հանդես է եկել դեռ 2012թ. և այսօրվա իրողություններից ելնելով չէ, որ հնչեցնում է այն: «Կուսակցությունը դառնում է ավելի պատասխանատու, երբ հրապարակում է կառավարության կազմը: Սա տեխնոլոգիա չէ, սա համակարգաստեղծ դրույթ է: Եթե սա դարձնենք թեզ ու ասենք, որ բոլոր կուսակցությունները, որոնք հավակնում են լինել ազդեցիկ, պետք է ընտրողներին ներկայացնեն վարչապետի թեկնածուին, փոխվարչապետների, նախարարների թեկնածուներին: Եթե որևէ կուսակցություն կհրաժարվի, դա իր խնդիրն է, դա պատճառ չի լինի, որ ինքը չմասնակցի ընտրություններին, բայց այդ կուսակցությունը կընկնի անհավասար մրցակցության մեջ»,- նշեց ՀՀԿ-ական պատգամավորը: