شمالي کوريا د خپلو کليدي تأسيساتو ړنګول پيل کړي
په واشنګټن کې يوه څېړنيز بنسټ پرون ويلي، دا د هغې ژمنې د عملي کېدو پر لوري لومړى ګام ګڼل کېږي چې شمالي کوريا د امريکا له ولسمشر ډونالډ ټرمپ سره کړې وه.
د ٣٨ نورت په نوم څېړنيز بنسټ ويلي، تازه عکسونه د هغې ودانۍ ړنګېدل ښيي چې فضا ته د توغول کېدونکو وسايلو د بسته کارۍ، د توغنديو د ماشينونو د ازموينې او د بالستيک ميزائيلو د مايع تېلو د ماشينونو د جوړولو لپاره ورڅخه ګټه اخيستل کېده.
د امريکا ولسمشر ډونالډ ټرمپ د شمالي کوريا له مشر کيم جونګ اون سره د جون د ١٢مې تر سرمشرېزې وروسته ويلي و، د شمالي کوريا مشر ورسره ژمنه کړې چې ډېر ژر به د ميزائيلو د ماشينونو د ازموينې يوه عمده ساحه ويجاړې کړي.