5 ადამიანი დაშავდა რუსთავის მეტალურგიულ ქარხანაში მომხდარი აფეთქების შედეგად
მორიგე ექიმის ინგა ბაკურაძის თქმით, ორი ადამიანი უკვე გაწერეს. დანარჩენები დაკვირვების ქვეშ იმყოფებიან.
"მათ აღენიშნებათ ტვინის შერყევა და კისრის მსუბუქი დაზიანება", - თქვა ექიმმა ინგა ბაკურაძემ.
მისივე ცნობით, სამივე პაციენტს, სავარაუდოდ, 24 ივლისს გაწერენ.
ერთ-ერთმა დაშავებულმა, გიორგიმ, რომელსაც საავადმყოფოს ეზოში შევხვდით და უკვე გაწერეს, რადიო თავისუფლებას უთხრა, რომ ჯართს, რომლის გადადნობაც დაიწყეს, სავარაუდოდ "რაღაც შეჰყვა".
"აფეთქება იმდენად ძლიერი იყო, რომ ტალღამ შორს მომისროლა და კედელს მიმანარცხა, ყველანი ასე დავშავდით - ხუთივე აფეთქების ტალღამ გადაგვაგდო", - თქვა გიორგიმ, რომელმაც გვარის დასახელება არ ისურვა. ის წელისა და კისრის არეში ტკივილს გრძნობს, დაუნიშნეს მკურნალობა.
ქარხნის ადმინისტრაცია მომხდარ ფაქტზე ჯერჯერობით დუმს.