Հայ-ռուսական միջկառավարական հանձնաժողովի համանախագահները քննարկել են գործարար կապերի զարգացումն ու թվային մեթոդների ներգրավումը տեղեկատվության փոխանակման գործում
Հուլիսի 13-ին կայացել է Ռուսաստանի և Հայաստանի միջև տնտեսական համագործակցության միջկառավարական հանձնաժողովի համանախագահներ ՌԴ տրանսպորտի նախարար Եվգենի Դիտրիխի և ՀՀ փոխվարչապետ Մհեր Գրիգորյանի հանդիպումը:
Ինչպես հաղորդվում է ՌԴ տրանսպորտի նախարարության կայքում, կողմերը վստահություն են հայտնել շարունակելու կառուցողական փոխհամագործակցությունը միջկառավարական հանձնաժողովի շրջանակներում, որն արդյունավետ հարթակ է հանդիսանում երկկողմ համագործակցությանը վերաբերող հարցերի օպերատիվ կարգավորման, փորձի փոխանակման և երկկողմ կապերի ամրապնդման համար ինչպես միջպետական, այնպես էլ միջտարածաշրջանային մակարդակներում:
Եվգենի Դիտրիխը հիշեցրել է, որ Երևանում փետրվարին կայացած նախորդ նիստի ընթացքում քննարկվել են արդյունաբերության, էներգետիկայի, տրանսպորտի, ռուս-հայկական ներդրումային հիմնադրամի ստեղծման բնագավառներում երկկողմ համագործակցության ընդլայնման հարցերը: Ընդգծվել է աշխատանքը շարունակելու կարևորությունը, որն ուղղված է հայ-ռուսական առևտրատնտեսական կապերի խորացմանը, ինչպես նաև փոխադարձ առևտրաշրջանառության հետագա աճին:
Հանդիպման մասնակիցները քննարկել են ռուս-հայկական ներդրումային հիմնադրամի ստեղծման հարցերը, որի առավել հեռանկարային ուղղությունը կարող է դառնալ համագործակցության աջակցությունն IT-տեխնոլոգիաների ոլորտում: Ընդգծվել է նաև հայկական արտադրանքի՝ ռուսական շուկա մատակարարման ընդլայնման հարցի մշակման անհրաժեշտությունը: Խոսքն ինչպես հայ արտադրողների և ռուսական առևտրային ցանցերի միջև գործարար կապերի զարգացման մասին է, այնպես էլ տեղեկատվության փոխանակման գործում թվային մեթոդների ներգրավման: