Եթե հուլիսի 16-ին քաղաքապետ չի ընտրվում, Երևանի ավագանու արտահերթ ընտրությունների պատշաճ իրականացումը հարվածի տակ է ընկնում. Դ. Իոաննիսյան
Եթե երկուշաբթի օրը՝ հուլիսի 16-ին, չի ընտրվում Երևանի քաղաքապետ, Երևանի ավագանու արտահերթ ընտրությունների պատշաճ իրականացումը հարվածի տակ է ընկնում. Tert.am-ի հետ զրույցում նման տեսակետ հայտնեց ՀՀ վարչապետին առընթեր ընտրական օրենսդրության բարեփոխումների հանձնաժողովի քարտուղար, «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը:
Նշենք, որ Երևանի ավագանու «Երկիր Ծիրանի» խմբակցությունը Զարուհի Փոստանջյանին առաջադրել է քաղաքապետի թեկնածու: Երևանի ավագանու «Հանրապետական կուսակցություն» խմբակցության անդամ Ենոք Ազարյանը Tert.am-ի հետ զրույցում ասել էր, որ իր տեղեկություններով՝ Հանրապետական խմբակցությունը չի ուզում քաղաքապետի թեկնածու առաջադրել: Իսկ «Ելք» խմբակցության ղեկավար Դավիթ Խաժակյանը Tert.am-ի հետ զրույցում հայտնել էր, որ քաղաքապետի թեկնածուի հարցի վերաբերյալ որոշում չի կայացվել: ԲՀԿ-ից տեղեկացրել էին, որ կմասնակցեն արտահերթ ընտրություններին:
Դանիել Իոաննիսյանը նշեց, որ Զարուհի Փոստանջյանի առաջադրումից բացի, եթե այլ թեկնածու չառաջադրվի, ապա ավագանին ցրվում է, և կառավարությունը նշանակում է Երևան քաղաքի ավագանու արտահերթ ընտրություններ:
«Մեկ թեկնածուով Երևանի քաղաքապետ չի ընտրվում, ավագանին ցրվում է, և կառավարությունը նշանակում է Երևան քաղաքի ավագանու արտահերթ ընտրություններ: Կարծում եմ՝ դեպքերի զարգացման այս սցենարում մենք ընտրություններ կունենանք սեպտեմբերի առաջին կեսին, ինչը նշանակում է, որ նախընտրական բազմաթիվ գործառույթներ իրականացնող մի հատվածը ինչպես օրինակ՝ ԿԸՀ-ն, լուրջ հարվածի տակ է հայտնվում, որովհետև տեխնիկապես ԿԸՀ-ն Երևանի ավագանու արտահերթ ընտրություններին դեռևս պատրաստ չէ»,-ասաց Իոաննիսյանը:
«Իրազեկ քաղաքացիների միավորում» ՀԿ ծրագրերի համակարգողը բացատրեց, որ նախընտրական քարոզչություն իրականացնելու շրջանն ընկնում է օգոստոս ամսին, երբ մարդ չկա, շատերը մեկնում են արձակուրդի:
«Ո՞ւմ համար պետք է քարոզչություն իրականացվի, քանի որ Երևանում համարյա մարդ չկա: Բացի այդ, ի՞նչ մարդկային ռեսուրսների միջոցով պետք է ձևավորվեն տեղամասային ընտրական հանձնաժողովները, մոտ 450 հանձնաժողով պետք է կարգավորի ընտրությունները, որից ամեն մեկում այս պահին գործող կարգավորումներով 10 հոգի պետք է ներառվեն, այսինքն՝ 4500 հոգի և դրան գումարած էլեկտրոնային սարքերի վրա աշխատող մասնագետները: Այսինքն՝ խոսքը մոտ 6000 մարդու մասին է, ինչպե՞ս են այդ մարդկանց օգոստոսին հավաքագրելու այդ կուսակցությունները և ընտրական հանձնաժողովները, ինչպե՞ս են այդ մարդկանց թրեյնինգներ անելու, դրանք շատ լուրջ հարցեր են»,-ասաց նա:
Դանիել Իոաննիսյանը նշեց, որ դա էր պատճառը, որ ինքը համարում էր, որ Երևանի ավագանին այդ նիստը պետք է նշանակեր օգոստոսի սկզբին, որ քաղաքապետի չընտրվելու սցենարում ընտրությունները նորմալ իրականացվեն: