Նիստերը համընկնում էին Կառավարության նիստերի հետ, դա էր պատճառը. Արարատ Միրզոյանը՝ ԱԺ ԸՕ հանձնաժողովի նիստերին չներկայանալու մասին
Ազգային ժողովում Ընտրական օրենսգրքի շուրջ ձևավորված ԱԺ աշխատանքային խմբի նիստին այսօր, ի վերջո, ներկայացավ ՀՀ վարչապետին առընթեր ընտրական օրենսդրության բարեփոխումների հանձնաժողովի նախագահ, ՀՀ փոխվարչապետ Արարատ Միրզոյանը, ում հետ քննարկեցին հետագա աշխատանքային ուղիները:
Սա ԱԺ աշխատանքային խմբի 5-րդ նիստն է: Նախորդ բոլորին Արարատ Միրզոյանը, չնայած հրավերին՝ չէր ներկայացել:
Նիստը վարող ՀՀԿ ներկայացուցիչ Դավիթ Հարությունյանը նշեց, որ իրենց պատկերացմամբ՝ ՀՀ վարչապետին առընթեր ընտրական օրենսդրության բարեփոխումների հանձնաժողովի հետ որպես 5-րդ եռյակ կքննարկեն հայեցակարգային մոտեցումները և կփորձեն գալ կոնսեսուսի:
Ըստ նրա՝ դա չի նշանակում՝ որևէ մեկը զրկվում է նախագիծ կազմելու հնարավորությունից:
Արարատ Միրզոյանը նախ պարզաբանեց նախորդ նիստերի չներկայանալու պատճառը և խնդրեց այն չդիտարկել՝ որպես հարգանքի բացակայություն ԱԺ-ում ձևավորված հանձնաժողովի նկատմամբ: Ըստ նրա՝ նիստերը համընկնում էին Կառավարության նիստերի հետ, դա էր պատճառը, ապա հույս հայտնեց՝ հետագայում ավելի ակտիվ կմասնակցի:
Առաջին փոխվարչապետի խոսքով՝ իրենց հանձնաժողովի առաքելությունն է՝ երկիրը պատրաստելու արտահերթ ազատ և թափանցիկ ընտրությունների, որպեսզի որևէ մեկի մոտ կասկած չմնա արդարության վերաբերյալ: