NATOnıñ iç bir azasınen Qırım ilhaqı kibi adise olması mumkün degil – Stoltenberg
NATOnıñ baş kâtibi Jens Stoltenberg, alyans azaları Rusiye ilhaq etken Qırımnı tanımama meselesinde bir olğanları ve 2014 senesi Qırımda yüz bergen vaqialar, NATOnıñ iç bir azasınen tekrarlanması mumkün olmağanını bildirdi. Bu aqta Stoltenderg NATOnıñ Brüsselde keçke sammitniñ ilk kününden soñ ötkerilgen matbuat konferentsiyasında ayttı.
Onıñ sözlerine köre, Qırım ilhaqı Suvuq uruş devrinde NATOnıñ kütleviy mudafaasını quvetlendirmek içün atqanın adımınıñ ilk sebebidir.
«Aynı zamanda bu, Baltıka devletlerinde, Poloniyada ve ayrıca Qara deñiz regionında arbiy küç olaraq bulunmamıznıñ da esas sebeplerinden biri olıp, Qırımda yüz bergen vaqialar NATOnıñ iç bir azasınen tekrarlanması mumkün olmaycağınen bağlı signal bermekten ibaret edi», – dep ilâve etti NATOnıñ yolbaşçısı.
Stoltenberg ayrıca, NATO «Ukrainağa siyasiy ve ameliy ceetten qol tutmağa devam eteceginde» bildirdi.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.