Ընտրական օրենսդրության բարեփոխումների խորհրդարանական աշխատանքային խումբը նախանիստ է գումարել
Ըստ Ազգային ժողովի մամուլի ծառայության հաղորդագրության, հանդիպման ընթացքում քննարկվել են Աշխատանքային խմբի հետագա աշխատանքների համակարգմանը վերաբերող կազմակերպչական և տեխնիկական մի շարք հարցեր:
«Հստակեցնելով ստեղծված Աշխատանքային խմբի նպատակները՝ փաստվել է, որ սպասվող բարեփոխումների շուրջ անհրաժեշտ է հասնել քաղաքական կոնսենսուսի, ինչն էլ պետք է երաշխավորի ընտրական լավագույն համակարգ ունենալու ցանկությունը: Ազգային ժողովի բոլոր խմբակցությունների ներկայացուցիչները համակարծիք էին, որ անհրաժեշտ է ՀՀ կառավարության հետ աշխատել փոխհամաձայնեցված և փոխգործակցությամբ», - ասված է հաղորդագրությունոմ:
Այս առնչությամբ Աշխատանքային խմբի անդամները խորհրդարանի նախագահին առաջարկել են իրենց անունից պաշտոնապես դիմել վարչապետին առընթեր ընտրական օրենսդրության բարեփոխումների հանձնաժողովի նախագահ Արարատ Միրզոյանին՝ ակնկալելով, որ Կառավարությունը կստեղծի երեք հոգուց բաղկացած լիազոր ներկայացուցիչների խումբ, որն էլ հետագայում կաշխատի խորհրդարանական աշխատանքային խմբի հետ:
Որոշվել է, որ մինչև առաջին նիստն Աշխատանքային խմբի անդամները պետք է ներկայացնեն իրենց տեսլականն ընտրական օրենսդրության բարեփոխումների մասին:
Հանդիպմանը քննարկվել են նաև այդ աշխատանքներում արտահախորհրդարանական քաղաքական ուժերի և քաղաքացիական հասարակության ներգրավվածության ու նրանց հետ հետագա համագործակցությանն առնչվող հարցեր:
Արա Բաբլոյանն առաջարկել է Աշխատանքային խմբի աշխատանքները համակարգել և սպասվող նիստերը վարել ռոտացիոն սկզբունքով: Առաջարկն ընդունվել է:
Աշխատանքային խմբի առաջին նիստը տեղի է ունենալու 2018 թվականի հուլիսի 4-ին՝ ժամը 12:00-ին Ազգային ժողովում: Առաջին նիստի նախապատրաստական աշխատանքները համակարգելու է Աշխատանքային խմբում ՀՀԿ խմբակցության ներկայացուցիչ Դավիթ Հարությունյանը:
Երեկ, հիշեցնենք, Ազգային ժողովի բոլոր 4 խմբակցությունները Ընտրական օրենսգրքի փոփոխությունների շուրջ քննարկումներ սկսելու պատրաստակամություն հայտնեցին:
Երկուշաբթի օրը Ազգային ժողովի նախագահը դիմել էր խմբակցություններին՝ առաջարկելով Ընտրական օրենսգրքի շուրջ քննարկումների մեկնարկի համար ձևավորել աշխատանքային խումբ, վարչապետ Նիկոլ Փաշինյանի հունսի 19-ի որոշմամբ էլ ստեղծվել է վարչապետին առընթեր ընտրական օրենսդրության բարեփոխումների հանձնաժողով: