Թուրքիայում կալանքի տակ գտնվող նախագահի քուրդ թեկնածուն որոշել է իր նախընտրական հանրահավաքն անցկացնել էլեկտրոնային տարբերակով
Թուրքիայի քրդամետ Ժողովրդադեմոկրատական կուսակցության նախկին համանախագահ, այժմ նախագահի թեկնածու Սելահաթթին Դեմիրթաշը, որը 2016 թվականի նոյեմբերից գտնվում է բանտում, որոշել է իր նախընտրական հանրահավաքն անցկացնել էլեկտրոնային տարբերակով՝ օգտագործելով սեփական թվիթերյան էջը, գրում է diken.com.tr կայքը։
«Բոլորիդ սպասում եմ իմ հանրահավաքին․ պաստառները, դրոշները վերցրեք, եկեք, շատ գեղեցիկ կլինի»,- գրել է Դեմիրթաշը սոցցանցի իր էջում։
Նշենք, որ Դեմիրթաշի փաստաբաններն ու քրդամետ կուսակցությունը մի քանի անգամ միջնորդություն են ներկայացրել դատարան՝ պահանջելով նախընտրական քարոզչության շրջանում ազատ արձակել գործչին՝ մյուս թեկնածուների հետ հավասար նախընտրական պայքարի պայմաններ ապահովելու համար։ Դատարանը, սակայն, մերժել է Դեմիրթաշին ազատելու պահանջը։
Հիշեցնենք, որ Թուրքիայում արտահերթ նախագահական ու խորհրդարանական ընտրությունները կկայանան հունիսի 24-ին։