ՊՆ-ում անհանգիստ մարդիկ շատ կան. չգիտեն՝ որ ուղղությամբ մտածեն՝ Ադրբեջանի, թե Վերահսկողական ծառայության ստուգումների. Դ. Սանասարյան

Շատ հարգելի կարծիք է Սասուն Միքայելյանի կարծիքը, բայց մենք մեր առաջնահերթություններն ունենք: Այս մասին այսօր  կառավարության նիստից հետո լրագրողների հետ զրույցում ասաց ՀՀ վերահսկողության ծառայության պետ Դավիթ Սանասարյանը՝ անդրադառնալով «Ելք» խմբակցության պատգամավոր Սասուն Միքայելյանի հայտարարությանը, որ բանակի հետ պետք է զգույշ լինել:

«Հենց հաշվի առնելով, որ առաջնագծում խնդիր ունենք՝ պետք է թիկունքը ճիշտ կազմակերպվի, թիկունքում խախտումներ, հանցագործություններ չլինեն: Մենք ուզում ենք՝ նախարարը մաքրված անցնի գործի, և չլինեն այն մտահոգությունները, որ թիկունքում արվել են շատ խախտումներ: Մենք ոչ թե վնասելու, ինչ-որ մեկին ինչ-որ բան ապացուցելու ենք գնում, այլ գնում ենք մեր ինֆորմացիայով, և այն մսխումները, որ տեղի են ունեցել, վերադարձվեն բյուջե»,-ասաց նա:

Tert.am-ի հարցին, թե եթե ՊՆ-ում նախկինում կատարված չարաշահումներ բացահայտվեն, արդյոք այդ առումով պատասխանատվության իր բաժինը չի՞ ունենալու ներկայիս նախարարը, որը նախկինում եղել է պաշտպանության փոխնախարար, և հնարավո՞ր է համարում այն, որ այն ժամանակ փոխնախարարը կարող էր այդ ամենից տեղյակ չլինել, Դավիթ Սանասարյանն ասաց, որ Դավիթ Տոնոյանի հետ որևէ խնդիր չունեն: «Եթե այս փոփոխություններից հետո պետք է նայենք, որ այս նախարարը մեր ընկերն է, բարեկամն է, ապա ինչի՞ համար են այս փոփոխությունները: Եթե իմ հեղափոխական ընկերների կառույցներում կլինեն թերացումներ, օրինախախտումներ, ապա իմ ընկերներն ավելի մեծ պատասխանատվություն ունեն, քան մյուսները»:

Դավիթ Սանասարյանն ասաց, որ չի ուզում կասկածներով արտահայտվել: Նա նկատեց, որ Ապրիլյան պատերազմին Դավիթ Տոնոյանն անում էր արտաքին գործերի նախարարի գործը, հանդիպումներ է ունեցել դեսպանների հետ: «Ես չգիտեմ այդ ժամանակ Դավիթ Տոնոյանի պատասխանատվությունը որ ոլորտում էր: Շատ թափանցիկ ենք աշխատելու, այնպես չի լինելու, որ գտնելու ենք մի բան ու աչք փակենք, չասենք, որ կարող է  սահմանին խնդիրներ լինեն: Տարիներ շարունակ ՀՀԿ-ն հանրությանը սխալ մեսիջներ է ուղարկել, որ ձայն մի հանեք, որ սահմանում խնդիրներ կլինեն,  ձայն պետք է հանենք, խնդիրները բարձրաձայնենք, որ էլ երբեք նման բաներ իրենց թույլ չտան: Ես գիտեմ՝ անհանգիստ մարդիկ այնտեղ շատ կան, տարբեր խողովակներով այդ ինֆորմացիան եկել է: Ըստ նրանց՝ չգիտեն, թե որ ուղղությամբ մտածեն՝ Ադրբեջանի, թե Պետական վերահսկողական ծառայության առաջիկա անելիք-ֆունկցիաների: Ես ասեմ հետևյալը. եթե դուք արել եք օրենքի տառին համապատասխան գործունեություն՝ պետք է նայեք դեպի Ադրբեջան և չհետաքրքրի, թե Վերահսկողության ծառայությունն ինչ ուսումնասիրություն կկատարի»,-ասաց նա: