Ընտրական օրենսգրքից ռեյտինգային ընտրակարգը պետք է հանվի, և ամբողջական համամասնական ընտրակարգ լինի. Լենա Նազարյան
Ընտրական օրենսգրքից ռեյտինգային ընտրակարգը պետք է հանվի, և ամբողջական համամասնական ընտրակարգ լինի: Այսօր ԱԺ-ում լրագրողների հետ զրույցում նման հայտարարություն արեց «Ելք» խմբակցության պատգամավոր Լենա Նազարյանը։ Նրա խոսքով՝ պետք է լրացուցիչ մեխանիզմներ մտածվեն, որով ցուցակները կարտացոլեն ընտրողների իրական պատկերը։
«Մենք նաև ուզում ենք, որ եթերով բոլոր կուսակցություններին հնարավորություն տրվի հավասարաչափ արտահայտելու իրենց դիրքորոշումները, ներկայացվեն իրենց ծրագրերը», - ասաց նա:
Պատգամավորը, խոսելով «Դաշնակցության« առաջարկի մասին՝ վերանայել, բայց պահպանել ռեյտինգային համակարգը, նշեց, որ աշխատանքյաին խումբը ստեղծվել է հենց այն նպատակով, որ քննարկի յուրաքանչյուր առաջարկություն։
Հարցին՝ ընտրությունների թափանցիկ լինելուն չի խանգարի այն հանգամանքը, որ ուժային կառույցները ենթարկվում են վարչապետին՝ հաշվի առնելով, որ Փաշինյանը բազմիցս նշել է, որ ուժային կառույցները պետք է գործեն որպես նախարարություններ և անմիջապես վարչապետին չենթարկվեն, իսկ վարչապետ Նիկոլ Փաշինյանի այս դիրքորոշումը դեռ պահպանվում է, Լենա Նազարյանը պատասխանեց.
«Համենայն դեպս չի հերքվել իր կողմից։ Եթե հայտարարվել է, ուրեմն պահպանվել է, բայց ես չեմ կարծում, որ այս կարճ ժամանկահատվածում հնարավոր է այդ կառուցվածքային փոփոխություններն իրականացնել, իսկ այդ մարմինների անկախության հետ կապված՝ որևէ կասկած չունեմ։ Անցած օրերի իրադարձությունները ևս մեզ համար ապացույց են, որ իրավապահ մարմինները և դատական համակարգը գործում են շատ ազատ»։
Ինչ վերաբերում է վարչապետ Նիկոլ Փաշինյանի՝ Աշխատանքի և սոցիալական հարցերի նախարար Մանե Թանդիլյանի հրաժարակի դիմումը չստորագրելուն, Լենա Նազարյան ասաց, թե շատ ուրախ է, որ Մանե Թանդիլյանը շարունակելու է պաշտոնավարել։
«Կարծում եմ՝ այս կարճ ժամանակահատվածում նա արդեն կարողացել է շատ հարցեր կարգավորել նախարարությունում, ունի շատ ծրագրեր, հուսով եմ, որ հնարավոություն կտրվի դրանք իրականացնել»,- եզրափակեց Լենա Նազարյանը: