Արդեն կան ներդրողներ թե՛ ԵՄ-ից, թե՛ ԱՄՆ-ից, թե՛ ՌԴ-ից, թե՛ Չինաստանից. Ա. Մինասյան (տեսանյութ)
Կան ներդրողներ, ես անուններ չեմ հրապարակի, բայց բավական մեծ ծավալի ներդրումների մասին է խոսքը: Ավելի կոնկրետ ներդրումը կլինի, դուք կտեսնեք: Այս մասին այսօր կառավարության նիստի մեկնարկից առաջ լրագրողների հետ ճեպազրույցում ասաց տնտեսական զարգացման և ներդրումների նախարար Արծվիկ Մինասյանը:
Նրա խոսքով՝ ներդրումները վերաբերում են արդյունաբերության, զբոսաշրջության, ծառայություններին, հատկապես՝ բարձրարժեք ծառայությունների ոլորտներին:
«Հիմնական, գրեթե բոլոր զարգացած երկրներից մենք ունենք ներդրման ցանկություն հայտնողներ, իսկ նրանք, ովքեր արդեն ծրագրերով են հանդես գալիս, թե՛ եվրոպական երկրներից են, թե՛ ԱՄՆ-ից, թե՛ Ռուսաստանից, թե՛ Չինաստանից»,- նշեց Արծվիկ Մինասյանը:
Ինչ վերաբերում է «Կուտակային կենսաթոշակների մասին» օրենքին, որը նախօրեին Ազգային ժողովի կողմից առաջին ընթերցմամբ ընդունվեց, Ա. Մինասյանն ընդգծեց, որ օրակարգից դուրս չի եկել հարցը:
«Դուք լսել եք վարչապետի հայտարարությունը, որ պարտադիր կուտակայինի հարցը օրակարգում է, մենք առաջիկայում մանրամասն վերլուծության պետք է ենթարկենք համակարգը և ներկայացնենք առաջարկություն: Այժմ ժամանակավոր լուծում է տրված, որպեսզի թեթևացվի բեռը անձանց, ովքեր պարտադիր կուտակային համակարգում են»,- ասաց նախարարը:
Մանրամասները՝ տեսանյութում: