ԱԺ-ն միաձայն ընդունեց «Բարեգործության մասին» ՀՀ օրենքը՝ երկրորդ ընթերցմամբ և ամբողջությամբ
ՀՀ Ազգային ժողովը երկրորդ ընթերցմամբ և ամբողջությամբ ընդունեց «Բարեգործության մասին» ՀՀ օրենքում փոփոխություն և լրացումներ կատարելու մասին» նախագիծը: Նախագիծն ընդունվեց միաձայն՝ 80 կողմ ձայներով:
ԱԺ-ն ընդունեց նաև «ՀՀ վարչական դատավարության օրենսգրքում փոփոխություն կատարելու մասին», «Զինվորական ծառայության և զինծառայողի կարգավիճակի մասին» ՀՀ օրենքում փոփոխություններ և լրացումներ կատարելու մասին» օրենքները:
Նշենք, որ «Բարեգործության մասին» ՀՀ օրենքում փոփոխություն և լրացումներ կատարելու մասին» նախագիծը նպատակ ունի բարեգործության բնագավառում ներկայում գործող կարգավորումները համապատասխանեցնել ՀՀ Սահմանադրության պահանջներին:
Սահմանվում է, որ ՀՀ վարչապետի որոշմամբ ստեղծվելու է բարեգործական ծրագրերի համակարգման խորհրդակցական հանձնաժողով, որը լիազորված մարմնին առաջարկություններ է ներկայացնելու: Սահմանվում է, թե որ ծրագրերն են ենթակա բարեգործական որակմանը և կարող են որակվել որպես հարկային արտոնություններ ստացող:
Նշենք, որ քննարկմանը արդարադատության փոխնախարար Արթուր Հովհաննիսյանը հավաստիացրել է, որ բարեգործության շրջանակը չի նեղացվում, նախաձեռնությամբ բարեգործների համար խոչընդոտներ ու նոր պարտականություններ չեն նախատեսվում:
Ըստ նրա, այս մարմնի հետ առնչվելը պայմանավորված է բացառապես հետևյալ երեք ակնկալիքի դեպքում. դիմում են հանձնաժողովին, որ ծրագիրը բարեգործական համարվի, որպեսզի ստանան պատվավոր կոչումներ, մյուս դեպքում դիմում են, որպեսզի նախատեսված պետական աջակցությունից օգտվեն և հարկային արտոնություններ ստանան, կամ ցանկանում են կառավարության կամ համայնքի կողմից նյութատեխնիկական օժանդակություն ստանալ: