AQŞnıñ aks-keşfiyatı Rusiyedeki futbol çempionatına gadjetlerni almamaqnı tevsiye ete
Evanina: «Bu tertibatlardaki er angi malümat, hususan şahsiy bilgiler Rusiye ükümeti ya da kibercinayetçilerniñ malı olmaq mümkün», – dedi.
O, «büyük şirketlerniñ vazifeli şahısları ve devlet memurları» eñ büyük telüke altında bulunalar, dep añlattı. AQŞ aks-keşfiyatınıñ memurı, yanlarına daa evel qullanılmağan tertibatnı almaqnı ve içinden akkumulâtornı çıqarmaqnı tevsiye etti. Diger Amerika memurı, adı bildirilmemek şartı ile, Britaniya mahsus hizmetleriniñ de Birleşken Qırallıq tebaaları ve Rusiyedeki Dünya çempionatında iştirak etken İngiltere futbol taqımı içün buña beñzer ihtarlarda bulunğanını bildirdi.
Amerika keşfiyat hizmetleri başqa büyük halqara sport yarışları ve şu cümleden yaqında Cenübiy Koreyada keçken Olimpiya oyunlarından evel de buña beñzer ihtarlarda buluna ediler.
Avropa parlamentiniñ deputatları iyün 14-te, Rusiyede başlaycaq Dünya futbol çempionatınıñ diplomatik boykotına davet etmege planlaştıralar.
Aprel ayında Avropa parlamentiniñ 60 deputatı, almaniyalı zenaatdaşları, Euronest parlament assambleyasınıñ ortaq reisi, Yeşiller fırqasınıñ azası Rebekka Harmsnıñ Avropa devletleriniñ ükümetlerine, bu yılnıñ iyün-iyül aylarında Kreml tarafından Rusiyede ötkerilmesi planlaştırılğan Dünya futbol çempionatını boykot etmege davetine artıq qol tuttılar.
Dünya futbol çempionatını boykot etmege davetler yapılğan esnada eñ azından 5 biñ Ukraina vatandaşı onıñ matçlarına bilet satın aldı. Bunı Ukraina Yuqarı Radası reisiniñ birinci muavini İryna Heraşçenko bildirdi.
Dünya futbol çempionatı 2018 senesi iyün 14 ve iyül 15 künleri arasında Rusiyede keçecek. Bu devlet, tarinında birinci kere dünya futbol çempionatınıñ saip-devleti olacaq.