Երբ զգանք, որ անհնարին է աշխատել, կամք կա, կհեռանանք. Արծվիկ Մինասյան
Վարչապետի առաջարկությամբ՝ կառավարությունն ընտրեց մի տարբերակ, որն այս պահին հնարավորինս մեղմացնում է քաղաքացիների եկամուտների բեռնվածությունը: Այսօր Ազգային ժողովում լրագրողների հետ զրույցում նման տեսակետ հայտնեց Տնտեսական զարգացման և ներդումների նախարար Արծվիկ Մինասյանն՝ անդրադառնալով կառավարության նիստին կենսաթոշակային համակարգի պարտադիր բաղադրիչի մասին որոշմանը:
«Առհասարակ համակարգի վերանայման, չեղարկման հարցը օրակարգում է և ուսումնասիրության կարիք ունի, այս որոշումն էլ կայացվել է այդ օրը կառավարության նիստում»,- ասաց նա: Արծվիկ Մինասյանը հիշեց, որ Սահմանադրական դատարանում Պարտադիր կուտակային կենսաթոշակային համակարգի հետ կապված դատական ակտը գործընկերոջ հետ շահել են, ինչը դեռևս իրականացված չէ:
Նախարարը հստակեցրեց, որ այս պահի դրությամբ ժամանակավոր, համաձայնության կառավարության որոշումը հետևյալն է՝ հուլիսի 1-ից կուտակայինի մեղմացում կլինի։ Ինչ վերաբերում է նրան, որ Նիկոլ Փաշինյանը հայտարարել է, որ համակարգը կիրառվում է, և եթե պարզվի, որ անօրինական գործընթացներ են տեղի ունեցել, գումարները հետ կտան, ապա հարցին՝ ավելի տրամաբանական չէ՞ ուսումնասիրել, տեսնել՝ ինչն է անօրինական նոր կիրարկել և 80 հազարին էլ չբերել համակարգ, Մինասյանն այսպես պատասխանեց. «200 հազարից ավելին համակարգում է, վարչապետը հստակ ձևակերպեց, որ եթե հետաձգում են 80 հազարի համար, ապա 200 հազարը լեգիտիմ հարց է բարձրացնում՝ եթե հետաձգում եք, մենք ինչո՞ւ պիտի շարունակենք վճարել»։
Նախարարը հավելեց, որ ինքը Կառավարությունում ՀՅԴ ներկայացուցիչն է և խոսել է ՀՅԴ-ի 10 տարվա պայքարի մասին: Նրա խոսքով՝ «Կուտակային կենսաթոշակների մասին» օրենքում այսօր առկա պարտադր բաղադրիչը տնտեսական ներկա պայմաններում չի համապատասխանում ՀՀ-ի և ՀՀ քաղաքացիների շահերին. «Մեր պայքարը փողոցում հստակ հիմնավորումներ ուներ, և հիմա այս կառավարությունն, ի տարբերություն նախորդների, ունի շանս և չի թաքցնում ուսումնասիրության հնարավորությունները»,- շարունակեց Արծվիկ Մինասյանը:
Ըստ նախարարի՝ սկզբունքայնությունն այն է, որ հետևողականորեն պետք է գնալ հարցադրումների պատասխանի ճանապարհով, որը այսքան տարի անընդատ բարձրացվել է։ «Դուք փորձում եք ինտրինգ փնտրել, բայց չկա այդպիսի բան այդքան ժամանակ, քանի այս կառավարությունը բաց, հրապարակային աշխատում է: Երբ զգանք, որ անհնարին է աշխատել, կամք կա, կհեռանանք»,- նշեց Մինասյանը։
Հարցին՝ հրաժարական չի տալու, Արծվիկ Մինասյանը պատասխանեց. «Դուք ուզո՞ւմ եք համոզել, որ հրաժարական տամ։ Հստակ պատասխանվել է՝ ոչ, չեմ պատրաստվում, ես տրամադրված եմ վճռական, որովհետև ոչ միայն այդ ոլորտում, այլև տնտեսական զարգացման ոլորտում, հակամենաշնորհային զարգացման ոլորտում հսկայական անելիքներ կան»:
Նախարարն, անդրադառնալով վարչապետ Նիկոլ Փաշինյանի՝ իր հետ խոսելու ոճին՝ հայտարարեց, որ ընթացքում կշտկվի այն։ «Անհաղթահարելի խնդիր է տեղի ունեցել։ Ես ավելի շատ կենտրոնացած եմ, թե ինչ պետք է անենք, քան շփման ձևերի վրա»,- եզրափակեց Արծվիկ Մինասյանը: