Putin Qırımnıñ Ukrainağa qaytarılması içün «iç bir şart» yoq dep saya

Rusiye prezidenti Vladimir Putin Rusiye Qırımnı Ukrainağa qaytarması içün iç bir türlü şart «yoq ve olması mumkün olmağanı» aqqında ayta. Putin bu aqta Rusiye prezidentiniñ saytında derc etilgen Avstriya ORF televizion kanalına bergen intervyusında söz yürsetilmekte.

Rusiye Qırımnı Ukrainağa qaytrması içün ne olmaq kerek degen sualge cevap bergen Putin: «Böyle bir şartlar yoq ve olması imkânsız», dep ayttı.

Bu arada, 2014 senesi yarımadada peyda olğan «yeşil adamçıqlar» kim edi, degen sualge o: «Bizim ordumız Qırımda qanuniy esasta buluna edi, muqavelege binaen anda bizim arbiy bazamız bar edi», dep cevap berdi.

«Yapqan ilk işimiz, – qast ve suiqast azırlanğanını körgen soñ, öz Silâlı quvetlerimizni, arbiy obyektlerni qorçalamaq içün biz kontingent miqdarını arttırdıq. İşte, er şey bundan başlandı. Men sizge eminlinen, bundan ğayrı anda kimdse yoq edi, faqat muqavelege köre bizim Silâlı quvetlerimiz bar edi», – dedi Putin intervyuda.

Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.