ԱԳ նախարարի օրակարգում 2008 թ. դիվանագիտական կոչումներից զրկված անձանց հետ հանդիպում այս պահին նախատեսված չէ. Տ. Բալայան
Արտաքին գործերի նախարարի օրակարգում 2008 թ. դիվանագիտական կոչումներից զրկված անձանց հետ հանդիպում այս պահին նախատեսված չէ: Այս մասին Tert.am-ի հետ զրույցում ասաց ՀՀ արտաքին գործերի նախարարի մամուլի խոսնակ Տիգրան Բալայանը:
«Մարտի 1» հասարակական կազմակերպության համակարգող Առաքել Սեմիրջյանը ֆեյսբուքյան իր էջում գրել էր, որ «ոչ պաշտոնական» տեղեկություն է հրապարակում, թե նոր իշխանությունները պատրաստվում են հաջորդ շաբաթ վերականգնել բոլոր այն դիվանագետների աստիճանները, ովքեր 2008 թ. փետրվարին կոչ էին արել իշխանություններին ու ընդդիմությանը նստել բանակցությունների սեղանի շուրջ, որ կանխվի արյունահեղությունը և այդ հայտարարության համար զրկվել էին իրենց կոչումներից: Սեմիրջյանը գրել էր, որ հնարավոր է նաև հանդիպում ԱԳ նախարար Զոհրապ Մնացականյանի հետ:
Այնինչ, Տիգրան Բալայանն ասաց, որ այս պահին նախարարի օրակարգում նման հանդիպում նախատեսված չէ:
ԱԳ նախարարի մամուլի խոսնակը նշեց, որ դիվանագիտական աստիճանները շնորհվում են դիվանագիտական ծառայության ընթացքում՝ օրենքով սահմանված կարգով և ժամկետներում: «Բարձրագույն դիվանագիտական աստիճանները շնորհվում են՝ ԱԳ նախարարի ներկայացմամբ, վարչապետի առաջարկությամբ՝ հանրապետութան նախագահի կողմից։ Այս ամենն ամրագրված է «Դիվանագիտական ծառայության մասին» ՀՀ օրենքում»,- նշեց Տիգրան Բալայանը: