Ոստիկաններն ու ԱԱԾ աշխատակիցները հայտնաբերել են Կարբի գյուղում ինքնաձիգով կրակոցներ արձակած կասկածյալին. shamshyan.com
Այսօր՝ մայիսի 28-ին, ոստիկանության քրեական հետախուզության գլխավոր վարչության, ոստիկանության Արագածոտնի մարզային վարչության, ոստիկանության Աշտարակի բաժնի գլխավորությամբ, համագործակցելով ՀՀ վարչապետին առընթեր Ազգային անվտանգության ծառայության հետ, ոստիկանության Աշտարակի բաժին է ներկայացել Արագածոտնի մարզի Կարբի գյուղի բնակիչ, 44-ամյա Արմեն Դավթյանը:
Ինչպես հայտնում է shamshyan.com-ը, վերջինս ոստիկանություն է ներկայացել այն բանից հետո, երբ տեղեկացվել է, որ իրավապահները իրեն են փնտրում երեկ՝ մայիսի 27-ին, Կարբի գյուղի գյուղապետարանի հարևանությամբ իր մոտ եղած հրազենով կրակոցներ արձակելու և մի քանի հոգու հրազենային վնասվածքներ պատճառելու կասկածանքով:
Նա տեղեկացվել է նաև, որ ոստիկանները դարանակալել են իր տան մոտ, ու հավանաբար իմացել են նաև, որ իր տվյալները փոխանցվել են սահմանային անցակետերին: Արդեն ոստիկանությունում բացատրական աշխատանքների արդյունքում նա հայտնել է, որ կրակոցները արձակել է ԱԿՍ-74 տիպի հրազենով, և մատնացույց է արել այն վայրը, որտեղ թաքցրել է ինքնաձիգը:
Քիչ առաջ ոստիկանների և Հայաստանի քննչական կոմիտեի Արագածոտնի մարզային քննչական վարչության ավագ քննիչ Արթուր Խլղաթյանի գլխավորությամբ նա ցույց է տվել թաքստոցի վայրը և այնտեղից ոստիկաններին ու քննիչին է ներկայացրել ինքնաձիգը, որը քննիչի որոշմամբ առգրավվել է և նշանակվել մի շարք փորձաքննություններ,այդ թվում՝ ձգաբանական:
Սկզբնաղբյուրի տեղեկություններով՝ Ա. Դավթյանը, ով նախկինում դատապարտված է եղել, քրեական աշխարհում հայտնի է «Զուբ» մականվամբ:
Հիշեցնենք, որ մայիսի 27-ին կրակոցներ էին հնչել Արագածոտնի մարզում։ Ժամը 22։30-ի սահմաններում Աշտարակի բժշկական կենտրոնից ոստիկանության Աշտարակի բաժին հայտնել էին, որ մարմնական վնասվածքներով իրենց մոտ են տեղափոխվել 3 քաղաքացի։
Ոստիկաններն ու քննիչները պարզել էին, որ վիրավորները Արագածոտնի մարզի Կարբի գյուղի բնակիչներ՝ 59-ամյա Վրեժ Խուրշուդյանն է, 34-ամյա Հենրիկ Գրիգորյանն է և 33-ամյա Արթուր Բաղդասարյանը։