Սասունցի Դավիթ և Սուվորով փողոցների խաչմերուկում ավտովթար է տեղի ունեցել. տուժածները հոսպիտալացվել են
Մայիսի 28-ին՝ ժամը 15:08-ին, «911» ծառայությանն ահազանգ է ստացվել, որ Երևան քաղաքի Սասունցի Դավիթ և Սուվորով փողոցների խաչմերուկում տեղի է ունեցել ՃՏՊ՝ ավտոմեքենան բախվել է ծառին ու գազատար խողովակին և շրջվել, կա տուժած. անհրաժեշտ է փրկարարների օգնությունը:
Դեպքի վայր է մեկնել ՀՀ ԱԻՆ ՓԾ հրշեջ-փրկարարական ջոկատից մեկ մարտական հաշվարկ:
Պարզվել է, որ բախվել են Toyota Camry մակնիշի 35 RO 005 (վարորդը՝ Ռ. Ե., ծնված 1989 թ.) և Toyota Camry մակնիշի 99 VV 109 պետհամարանիշերով (վարորդը՝ Գ. Ք., ծնված 1992 թ.) ավտոմեքենաները:
Բախման հետևանքով 35 RO 005 պետհամարանիշով ավտոմեքենան դուրս է եկել ճանապարհի երթևեկելի գոտուց, բախվել ճամփեզրի ծառին ու գազատար խողովակին և կողաշրջվել:
Ավտոմեքենաների վարորդները հոսպիտալացվել են «Էրեբունի» ԲԿ, որտեղ բժիշկները Ռ. Ե.-ի վիճակը գնահատել են միջին ծանրության, իսկ Գ. Ք.-ն ստացել է անհրաժեշտ բուժօգնություն և դուրս գրվել:
Փրկարարներն ուղղել են 35 RO 005 պետհամարանիշով ավտոմեքենան, հոսանքազրկել և փակել ավտոմեքենաների գազի բալոնների փականները: