Էրդողանն այլևս ոչնչով չի տարբերվում սնանկացած վաճառականից․ Դեմիրթաշ
Թուրքիայի քրդամետ Ժողովրդադեմոկրատական կուսակցության նախկին համանախագահ, այժմ նախագահի թեկնածու Սելահաթթին Դեմիրթաշը հայտարարել է, որ Թուրքիայի գործող նախագահ Ռեջեփ Թայիփ Էրդողանն այլևս նմանվել է «սննկացած վաճառականի», գրում է demokrathaber.org կայքը։
«Նա այլևս ոչնչով չի տարբերվում սննկացած վաճառականից», - ասել է Դեմիրթաշը՝ պատասխանելով այն հարցին, թե ի՞նչ ունի Էրդողանն առաջարկելու կամ խոստանալու Թուրքիայում ապրող ժողովուրդներին այսօր։
«Եթե նման բան լիներ՝ կլսեինք նախընտրական ծրագրում»,- նշել է քուրդ գործիչը։
Նա նաև պնդել է, որ Թուրքիայի ներկա իշխանություններն այս պահին այլ ելք չունեն, քան իրենց գոյությունը պահել ներքին ու արտաքին պատերազմներ հրահրելով։
Հիշեցնենք, որ Դեմիրթաշն ավելի վաղ հայտարարել է, որ նախագահ ընտրվելու դեպքում թուրք-հայկական սահմանը կբացվի՝ առանց որևէ նախապայմանի։
«Կվերացվի Հայաստանի հանդեպ կիրառվող տնտեսական շրջափակումը, կզարգացվեն անհրաժեշտ քաղաքական, տնտեսական ու դիվանագիտական հարաբերությունները, Թուրքիայի կողմից միակողմանի կերպով փակված հայ-թուրքական սահմանը կբացվի՝ առանց նախապայմանների։ Մենք նաև կաջակցենք Հայաստանի ու Ադրբեջանի միջև առկա արցախյան հիմնախնդրի՝ խաղաղ ճանապարհով լուծման ջանքերին»,- նշված է Դեմիրթաշի նախընտրական ծրագրում։