Վերահաստատում ենք Հայաստանի հանձնառությունը ԼՂ հիմնահարցի բացառապես խաղաղ հանգուցալուծմանը. Զոհրաբ Մնացականյան
Վերահաստատում ենք Հայաստանի հանձնառությունը ԼՂ հիմնահարցի բացառապես խաղաղ հանգուցալուծմանը. Ֆրանսիայի Եվրոպայի և արտաքին գործերի նախարար Ժան-Իվ Լը Դրիանի հետ համատեղ ասուլիսի ժամանակ նման հայտարարություն արեց ՀՀ արտաքին գործերի նախարար Զոհրաբ Մնացականյանը:
«Հայաստանը կարևորում է Ֆրանսիայի կողմից գործադրվող միջնորդական ջանքերը ԵԱՀԿ մյուս համանախագահ երկրների` Ռուսաստանի և Միացյալ Նահանգների հետ միասին ԼՂ խաղաղ կարգավորման ուղղությամբ: Այս համատեքստում վերահաստատում ենք Հայաստանի հանձնառությունը ԼՂ հիմնահարցի բացառապես խաղաղ հանգուցալուծմանը: Համակարծիք ենք, որ գործընթացի հաջողության համար կարևոր է խաղաղությանը միտված մթնոլորտի առկայությունը»,- ասաց նա:
Զոհրաբ Մնացականյանի խոսքով՝ այսօր հանդիպմանը, վերընշյալ հարցից զատ, Ֆրանսիացի իր գործընկերոջ հետ քննարկել են երկու երկրների տարբեր ոլորտներում ունեցած համագործակցությունն ընդլայնելու հարցեր, Ֆրանկոֆոնիայի գագաթնաժողովի անցկացման հետ կապված կազմակերպչական հարցեր, անդրադարձել են տարածաշրջանային խնդիրներին:
Հիշեցնենք, որ Ֆրանսիայի արտաքին գործերի նախարարը Հայաստանում է ՀՀ արտաքին գործերի նախարար Զոհրաբ Մնացականյանի հրավերով։ Ժան-Իվ Լը Դրիանն այսօր եղել է Ծիծեռնակաբերդում, մասնակցել է Առաջին Հանրապետության 100-ամյակին նվիրված միջոցառումներին: