Թե ովքեր կլինեն նոր մարզպետները, նշել չեմ կարող, բայց գերակշռելու են երիտասարդները. Սուրեն Պապիկյան
Կարծում եմ՝ քաղաքական իրավիճակն այնպիսին է, որ հանրապետական խորհրդարանական մեծամասնությունը պիտի գիտակցի, որ մեր պետության առաջ ծառացած մարտահրավերները լուծելու համար անհրաժեշտ է, որ իրական քաղաքական մթնոլորտը նաև արտացոլվի խորհրդարանում:
Այս մասին «Ազատություն» ռադիոկայանի եթերում ասել է Տարածքային կառավարման և զարգացման նախարար Սուրեն Պապիկյանը՝ անդրադառնալով Ընտրական օրենսգրքի փոփոխության անհրաժեշտությանը:
Պատասխանելով «Ազատության» այն հարցին, թե ինչպես են մեծամասնություն ՀՀԿ-ին համոզելու, որ ռեյտինգային ընտրակարգը փոխվի, նա ասել է. «Մենք համոզելու խնդիր չունենք: Եթե նրանց մեջ կան մարդիկ, որ գոնե մի փոքր իրենց պետականամետ են համարում, նաև իրականում պետականամետ են, ապա պիտի խելամիտ լինեն ու կատարեն այդ կարևոր քայլը: Վստահություն, բնականաբար չունեմ, թե իրենք ինչպես կվարվեն, բայց համոզված եմ, որ ժողովրդի ցանկությունն ի կատար է ածվելու: Այսօր հանրությունն ուզում է նոր որակի խորհրդարան, այսինքն՝ քաղաքական իրավիճակն արտացոլող նոր խորհրդարան: Դա մեր երկրի շահերից բխող քայլ պետք է լինի, և մենք այդ քայլին պետք է գնանք»:
Անդրադառնալով դիտարկմանը, թե ընտրակեղծարարության հիմնական մասը մարզերում է լինում՝ մարզպետների գլխավորությամբ, նախարարը նշել է, որ մեղքը բարդել միայն մարզպետների վրա, չի կարելի, բայց տարիներ շարունակ մարզպետն ունեցել է կարևոր դերակատարում այդ պրոցեսում, ղեկավարել է այդ ամենը մարզի տարածքում:
«Բայց առանցքային նշանակություն ունեն նաև տեղական մեծահարուստները, որոնք տարիներ շարունակ իրենց կուսակցության, իշխանության թողտվության պայմաններում կուտակել են որոշակի հարստություն և ժամանակ առ ժամանակ դա ծառայեցրել են իրենց կուսակցության շահերին: Այսինքն՝ իրենց ֆունկցիան եղել է 5 տարի մեկ ձայն ապահովելը իշխող կուսակցության համար: Մարզպետը դա պարզապես համակարգել է: Նոր Հայաստանում, այս իշխանության պայմաններում մարզպետը նման ֆունկցիա չի կարող ունենալ: Այսինքն՝ տարածքային կառավարման և տեղական ինքնակառավարման մարմինները ոչ մի դերակատարում չեն կարող ունենալ ընտրական պրոցեսներում: Դա օրենքի պահանջն է: Մենք ամեն ինչ անելու ենք, որ օրենքը գերակա լինի»,-ասել է նա։
Խոսելով մարզպետների մասին՝ Սուրեն Պապիկյանն ասել է, որ բոլորին փոխելու են: Մարզպետներ լինելու են այն մարդիկ, որոնց գործունեությունը և էությունը համապատասխանում է Հայաստանի նոր որակի պաշտոնյայի կարգավիճակին:
«Օրենքով սահմանված կարգով՝ մեր լիազորությունների շրջանակում, այն մարդկանց, ովքեր կփորձեն չկատարել իրենց պարտականությունները, մենք կարգի կհրավիրենք: Թե ովքեր կլինեն նոր մարզպետները, նշել չեմ կարող, բայց գերակշռելու են երիտասարդները»,-հավելել է նա: