Шөкеев "ҚазАгро" компаниясының шығыны себебін айтты
"Біріншісі, кезінде компания шетелден валютамен несие алып, оны басқа екінші деңгейлі банктерге теңгемен салған. Кейін девальвация болған кезде бағам айырмашылығы шықты. Сосын, кейбір екінші деңгейлі тұрақсыз банктерге ақша салынып, салдарынан 58 миллиард теңге жоғалды. Былтырдан бері бұл тапшылықты жойдық. Қазір капиталды ұлғайтып, транштар мен капиталға ақша құйып жатырмыз. Сосын валютамен алған несиелерді теңгеге ауыстыруға тырысып жатырмыз. "ҚазАгро" үкіметтің ауыл шаруашылығы саласындағы негізгі операторы болғандықтан оны банкрот болуға жол бермейміз, жағдайын тұрақтандырамыз" деді Шөкеев.
Ауыл шаруашылығы министрі бұған дейін Әлеуметтік сақтандырудың мемлекеттік қорында (ӘСМҚ) жиналған қаржының 10 пайызы "ҚазАгро" компаниясының облигациясын сатып алуға бөлінетінін хабарлаған.
"ҚазАгро" оны коммерциялық мақсатта, нақтырақ айтсақ астық сатып алуға жұмсайды. Бұл қаржы жұмсалады және қайтарылады. Бұл мүлдем қауіпсіз" деген Шөкеев.
Бұған дейін Қазақстан қор биржасы "ҚазАгро" компаниясының былтыр 120 миллиард теңгеден астам шығынға ұшырағанын хабарлаған.