«Մի անգամ էլ մզկիթի անուն տա՝ նրան խայտառակ կանեմ այս հրապարակներում»․ ընդդիմադիր նախագահի թեկնածուն՝ Էրդողանին
Թուրքիայի ընդդիմադիր Ժողովրդահանրապետական կուսակցության կողմից առաջադրված նախագահի թեկնածու Մուհարրեմ Ինջեն մեղադրել է գործող նախագահ Ռեջեփ Թայիփ Էրդողանին՝ կրոնական արժեքները քաղաքական քարոզչության մեջ օգտագործելու համար, գրում է demokrathaber.org կայքը։
«Սա քաղաքական հարթակ է, այստեղ մզկիթներից չեն խոսում։ Մզկիթը քո անձնական գո՞ւյքն է։ Մի անգամ էլ մզկիթի անուն տա՝ նրան խայտառակ կանեմ այս հրապարակներում», - ասել է Ինջեն։
Ընդդիմադիր գործչին հատկապես բարկացրել է այն փաստը, որ Էրդողանը պարբերաբար հիշեցնում է, թե Ժողովրդահանրապետական կուսակցության իշխանության օրոք Թուրքիայում բազմաթիվ մզկիթներ են ավերվել։
Ավելի վաղ Ինջեն մեղադրել էր գործող նախագահին պաղեստինցի ժողովրդի ողբերգությունն իր ներքաղաքական շահերի ու քարոզչական նպատակներով օգտագործելու համար։
«Անցյալ անգամ ասում էր՝ «Գազա պիտի գնամ, իմ այցից հետո Գազան շրջափակումից դուրս կգա»։ Գնացի՞ր։ Մե՛ղք է․․․Այնտեղ մահմեդականներն են ցավ քաշում, մահանում, մի՛ արա նման բան։ Ճշմարիտ քաղաքականությա՛մբ զբաղվիր։ Դիմացից Իսրայելի դեմ խոսելով՝ հետևում նրանց հետ գործարք մի՛ կնքիր։ Մահմեդականներին մի՛ օգտագործիր, նրանց սուտ մի՛ ասա», - ասել էր Ինջեն։