Ukraina TİN: Qırımdaki tintüv ve tevqiflernen bağlı malümat halqara mahkemelerde delil olaraq qullanılacaq
«Hususan Adalet nazirligi iyün ayınıñ ortasında siyasiy mabüsler boyunca Avropa insan aqları mahkemesine şikâyet bermek kerek, TİN BMT Halqara mahkemesi içün, diskriminatsiyanıñ bütün şekillerini yasaqlağan ve davalarımıznıñ daa bir mevzusı olğan şartname boyunca hususan, qırımtatarlarnen bağlı olaraq deliller toplay», – dedi TİN matbuat-kâtibi.
Onıñ sözlerine köre, Qırımda keçken soñki tintüv ve tevqiflerni «gibrid sürgün» dep tanımaq mumkün.
Mayısnıñ 21-nde Rusiye küç idaresiniñ hadimleri Bağçasarayda «Qırım birdemligi» birleşmesiniñ koordinatorı Server Mustafayev ve Bağçasaray rayonınıñ Topçıköy köyünde Edem Smailovnıñ evlerinde tintüvler ötkerdi.
Daa soñra FSB, Rusiyede ve ilhaq etilgen Qırımda yasaqlanğan «Hizb ut-Tahrir» teşkilâtında iştirak etüvde qabaatlanğan eki kişi tutulıp alınğanı bildirdi. Tutulğan şahıslarnıñ isimleri bildirilmey.
Rusiye Qırımnı ilhaq etken soñ, mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilip başladı.