Britaniya RT-nin qərəzsizliyini araşdırır
“RT-nin xəbərlər proqramlarının qərəzsizliyi ilə bağlı daha üç istintaq başladılıb”, – Ofcom-un sözçüsü mayın 21-də yaydığı bəyanatda deyib.
Bundan öncə apreldə yeddi təhqiqat açılıb, kanalın martda Britaniyada rusiyalı keçmiş casusun zəhərlənməsi məsələsində qərəzsizlik qaydalarını pozub-pozmadığı araşdırılır.
Ofcom onda deyirdi ki, Sergei Skripal və qızı sinir qazı hücumuna məruz qalandan sonra RT-nin narahatlıq yaradan verilişlərinin sayında “ciddi artım” baş verib.
“Verilişlərimiz Ofcom təhqiqatları üçün sonsuz mənbədir. Nəyi seçirlərsə, seçsinlər, heç nə tapa bilmirlər, ancaq yenə də ümidlərini itirmirlər”, – RT-nin baş redaktoru Margarita Simonyan mayın 21-də Twitter-də yazıb.
Britaniya zəhərlənmə insidentinə görə Rusiya prezidenti Vladimir Putin hökumətini suçlayır. Ancaq Moskva ittihamları rədd edir.