Bir buçuq biñge yaqın kişi qırımtatarlarnıñ sürgün etilmesi qurbanlarınıñ hatırasına Çatırdağğa köterildi
Tedbir iştirakleriniñ fikrine köre, olarnıñ baş maqsadı – dağğa köterilmek ve böylelikle sürgün etilüv vaqtında elâk olğanlarğa sayğı köstermektir. Bir çoqlarnıñ qolunda, üstüne qara şeritler bağlanğan qırımtatar bayraqları bar edi.
Dağnıñ töpesinde dua keçirilip, namaz qılındı.
Mayıs 18-de Ukrainada Qırımtatar halqınıñ sürgün etilüvi kününe bağışlanğan hatıra tedbirleri planlaştırıldı. Er yıl bu künde 1944 senesiniñ facialı vaqialarını hatırlaylar. O vaqıt tamır halqı yarımadadan Orta Asiyağa sürgün etildi. Umumen 180 biñden ziyade kişi sürgün etildi. Ukrainada qırımtatar halqınıñ sürgün etilmesi genotsid olaraq tanıldı.