Сурияга йўл олган жиззахлик йигит Грузияда қўлга олинди (видео)
0
Фото: «Ўзбекистон 24»
Жиззахлик Каримжон Қодиров дастлаб Россияга ишлаш учун бориб, у ерда террорни тарғиб қилувчиларнинг таъсирига тушиб қолади ҳамда уларнинг тарғиботи билан қисқа муддат шуғулланиб ҳам келади. Бу ҳақда UzNews хабар бермоқда.
Шундан кейин унга Сурияда террорчилар сафига келиб қўшилиш таклифи ҳамда йўл харажатлари учун 1000 доллар миқдорида маблағ ва қалбаки паспорт юборилади.
Қалбаки паспорт билан Туркия орқали Сурияга кетаётган Каримжон Қодировни Туркия ҳуқуқ тартибот идоралари ходимлари Грузияга «депорт» қилади. У бу ҳақда раҳнамоларини хабардор қилганида эса, улар Грузияда кутиб туриши кераклигини айтади.
Каримжон Қодиров Грузияда унга юборилган Қирғизистоннинг қалбаки фуқаролик паспорти билан яна ўз йўлида давом этиш ҳаракатида бўлганида Ўзбекистон ҳамда Грузия ҳуқуқ-тартибот идоралари ходимларининг ҳамкорлигида қўлга олинади.
Ўзбекистон Республикаси Жиноят кодексининг тегишли моддалари билан айбланган Қодиров Каримжон Раҳимжон ўғли ҳозирда УЯ 64/47 да қамоқ жазосини ўтамоқда.